ទំនាក់ទំនងពាណិជ្ជកម្ម និងការវិនិយោគរបស់វិនិយោគិនកូរ៉េនៅក្នុងប្រទេសកម្ពុជានឹងកើនឡើងបន្ថែមទៀតបន្ទាប់ពីផ្នែកឯកជននៃប្រទេសទាំង ២ បានចុះអនុស្សរណៈនៃការយោគយល់គ្នា(Memorandum of Understanding – MoU) ដើម្បីបង្កើតឱកាសថ្មីៗសម្រាប់ធុរជននៃប្រទេសទាំងពីរអាចធ្វើការជាមួយកាន់តែសកម្មថែមទៀត។
MoU នេះត្រូវបានធ្វើឡើងរវាងសមាគមឧកញ៉ាកម្ពុជា និងសភាពាណិជ្ជកម្មកូរ៉េនៅកម្ពុជា នៅសណ្ឋាគារសាំងគ្រីឡា ភ្នំពេញ កាលពីរសៀលថ្ងៃទី៣ ខែកក្កដា ឆ្នាំ២០២៦ ដោយមានការចូលរួមពីលោក ហាន់ ឃាង អនុប្រធានក្រុមប្រឹក្សាភិបាលនៃសមាគមឧកញ៉ាកម្ពុជា និងលោក រ៉ូប៊ីន គីម ប្រធានសភាពាណិជ្ជកម្មកូរ៉េនៅកម្ពុជា (Robin Kim, President of the Korean Chamber of Commerce in Cambodia)។
MoU នេះត្រូវបានរៀបចំឡើងក្នុងគោលបំណងពង្រឹង និងពង្រីកកិច្ចសហប្រតិបត្តិការរវាងសមាគមឧកញ៉ាកម្ពុជា និងសភាពាណិជ្ជកម្មកូរ៉េនៅកម្ពុជា ដើម្បីលើកកម្ពស់សកម្មភាពធុរកិច្ច និងការវិនិយោគរបស់សហគ្រាសកូរ៉េនៅកម្ពុជា ព្រមទាំងជំរុញការផ្លាស់ប្តូរព័ត៌មាន បទពិសោធ និងឱកាសធុរកិច្ច ក៏ដូចជារួមចំណែកជំរុញការអភិវឌ្ឍសេដ្ឋកិច្ចប្រកបដោយចីរភាព តាមរយៈការប្រើប្រាស់ធនធាន សក្តានុពល និងបណ្តាញទំនាក់ទំនងរបស់ភាគីទាំងពីរប្រកបដោយប្រសិទ្ធភាព។
MoU នេះក៏នឹងក្លាយជាក្របខ័ណ្ឌដ៏សំខាន់សម្រាប់ពង្រឹងកិច្ចសហប្រតិបត្តិការលើវិស័យដែលមានផលប្រយោជន៍រួម ដូចជា ការគាំទ្រដល់ការចូលទីផ្សារ និងការបង្កើតអាជីវកម្មរបស់ក្រុមហ៊ុនកូរ៉េនៅកម្ពុជា, ការជំរុញកិច្ចសហប្រតិបត្តិការក្នុងវិស័យឧស្សាហកម្មអាទិភាព, ការរៀបចំវេទិកាធុរកិច្ច, និងជំនួបផ្គូផ្គងធុរកិច្ច ការផ្លាស់ប្តូរព័ត៌មាន និងឱកាសវិនិយោគ ព្រមទាំងការសម្របសម្រួលលើគំនិតផ្តួចផ្តើមពាក់ព័ន្ធរបស់រាជរដ្ឋាភិបាល និងការចូលរួមក្នុងកិច្ចសន្ទនាគោលនយោបាយ។
សមាគមឧកញ៉ាកម្ពុជា បានលើកឡើងថា៖«ការចុះហត្ថលេខាលើអនុស្សរណៈនៃការយោគយល់គ្នានេះ បានឆ្លុះបញ្ចាំងពីការប្តេជ្ញាចិត្តរួមរបស់ភាគីទាំងពីរក្នុងការលើកកម្ពស់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគរវាងកម្ពុជា និងសាធារណរដ្ឋកូរ៉េ ឱ្យកាន់តែរឹងមាំ និងមានប្រសិទ្ធភាព ស្របតាមបរិបទនៃការធ្វើសមាហរណកម្មសេដ្ឋកិច្ចក្នុងតំបន់ និងសកលលោក ដើម្បីបង្កើតឱកាសថ្មីៗជូនដល់ធុរជន និងវិនិយោគិននៃប្រទេសទាំងពីរ»។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៦ ខែកក្កដាថា ភាពល្អប្រសើរនៃទំនាក់ទំនងការទូត និងការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ កំពុងជួយឱ្យការធ្វើពាណិជ្ជកម្ម និងការបណ្តាក់ទុនរវាងប្រទេសទាំង ២ ល្អប្រសើរជាបន្តបន្ទាប់។ លោកបន្តថា វិនិយោគិនកូរ៉េ អាចត្រូវបានចាត់ទុកជាផ្នែកសំខាន់មួយដែលចូលមកវិនិយោគនៅកម្ពុជាក្នុងរយៈពេលជាង ២ ទសវត្សរ៍កន្លងមក។ គម្រោងវិនិយោគរបស់កូរ៉េ មានភាគច្រើនក្នុងវិស័យអចលនទ្រព្យ សំណង់ កសិកម្ម រោងចក្រកែច្នៃផលិតផលកសិកម្ម និងវិស័យហិរញ្ញវត្ថុ។
លោកប្រាប់ទៀតថា ដើម្បីទាក់ទាញវិនិយោគិនកូរ៉េឱ្យចូលមកវិនិយោគផ្ទាល់នៅកម្ពុជាកាន់តែច្រើន រាជរដ្ឋាភិបាលកម្ពុជាក៏កំពុងជំរុញឱ្យមានការបង្កើតតំបន់សេដ្ឋកិច្ចដែលមានការចូលរួមពីសំណាក់វិនិយោគិនក្នុងស្រុក និងកូរ៉េ។
លោកថ្លែងថា៖«ប្រសិនបើមានតំបន់សេដ្ឋកិច្ចកម្ពុជា-កូរ៉េ គឺប្រាកដជានឹងអាចទាក់ទាញវិនិយោគិនកូរ៉េចូលមកបណ្តាក់ទុនកាន់តែច្រើន ហើយទំហំពាណិជ្ជកម្មទ្វេភាគី ក៏នឹងកើនឡើងផងដែរ»។
ទិន្នន័យអគ្គនាយកដ្ឋានគយ និងរដ្ឋាករកម្ពុជា (GDCE) ឱ្យដឹងថា ក្នុងរយៈពេល ៥ខែដើមឆ្នាំ២០២៦ ការនាំចេញនាំចូលទំនិញរវាងកម្ពុជា-កូរ៉េ មានទឹកប្រាក់សរុប ៤៧៦,៨៨ លានដុល្លារ កើនឡើង ៣១,៥% បើធៀបរយៈពេលដូចគ្នាក្នុងឆ្នាំ២០២៥ ដែលមាន ៣៦២,៥៨ លានដុល្លារ។ ក្នុងចំនួននេះ គឺទំនិញកម្ពុជានាំទៅប្រទេសកូរ៉េ ១៧០,១ លានដុល្លារ កើនឡើង ៣៦,៧% ចំណែកទំនិញកូរ៉េនាំមកវិញ ៣០៦,៧៧ លានដុល្លារ កើនឡើង ២៨,៨%។
អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) លោក ស៊ុន ចាន់ថុល កាលពីខែមិថុនា បានដឹកនាំមន្ត្រីជាន់ខ្ពស់ និងតំណាងផ្នែកឯកជននៅកម្ពុជាជាច្រើនរូបទៅកាន់ប្រទេសកូរ៉េ ក្នុងបំពេញបេសកកម្មគោះទ្វារទាក់ទាញ និងជំរុញវិនិយោគកូរ៉េ ឱ្យចូលមកវិនិយោគនៅកម្ពុជាកាន់តែច្រើន។ ក្នុងបេសកកម្មនេះ ភាគីកម្ពុជាបានជួបពិភាក្សាជាមួយតំណាងរដ្ឋាភិបាល និងផ្នែកឯកជនកូរ៉េជាច្រើន ដូចជា រដ្ឋមន្ត្រីក្រសួងពាណិជ្ជកម្មកូរ៉េ(Minister of Trade of Republic of Korea), ទីភ្នាក់ងារជំរុញពាណិជ្ជកម្ម និងការវិនិយោគកូរ៉េ (KOTRA), គណៈគ្រប់គ្រងក្រុមហ៊ុន Samsung Electronics, ក្រុមហ៊ុន Emons Furniture Co., Ltd, ក្រុមហ៊ុន Daejoo KC Group, និងក្រុមហ៊ុន Kyungshin Co., Ltd ជាដើម៕
