សេដ្ឋកិច្ចកម្ពុជាក្នុងឆ្នាំ២០២៦ នេះត្រូវបានមូលនិធិរូបិយវត្ថុអន្តរជាតិ(IMF) ព្យាករថានឹងសម្រេចបានក្នុងអត្រាកំណើន ៣% ដោយបានបន្ថយពីអត្រា ៤% ដែលបានព្យាករកាលពីអំឡុងពាក់កណ្តាលខែមេសាកន្លងមក។
ថ្លែងប្រាប់អ្នកសារព័ត៌មានពីការិយាល័យប្រចាំប្រទេសកម្ពុជា នាព្រឹកថ្ងៃទី៨ ខែកក្កដា នេះ លោក Kenichiro Kashiwase ដែលបានដឹកនាំក្រុមការងារបស់មូលនិធិរូបិយវត្ថុអន្តរជាតិ (IMF) មកប្រទេសកម្ពុជាដើម្បីជួបពិភាក្សាជាមួយអាជ្ញាធរកម្ពុជា តំណាងវិស័យឯកជន និងដៃគូអភិវឌ្ឍន៍ ចាប់ពីថ្ងៃទី២៤ ខែមិថុនា ដល់ថ្ងៃទី៨ ខែកក្កដា ឆ្នាំ២០២៦ ក្នុងក្របខ័ណ្ឌនៃការពិគ្រោះយោបល់តាមមាត្រា IV (Article IV Consultation) ឆ្នាំ២០២៦ បានឱ្យដឹងថា ទោះបីជួបនឹងវិបត្តិខាងក្រៅ និងខាងក្នុងជាច្រើនក៏ដោយ ក៏សេដ្ឋកិច្ចរបស់ប្រទេសកម្ពុជានៅតែមានភាពធន់ ដោយគ្រាន់តែអត្រាកំណើនបានធ្លាក់ចុះបន្តិចបើធៀបនឹងឆ្នាំ២០២៥។
លោកបានអះអាងថា កំណើនផលិតផលក្នុងស្រុកសរុប (GDP) ពិតប្រាកដ ដែលទទួលបានការគាំទ្រពីតម្រូវការខាងក្រៅ ការវិនិយោគផ្ទាល់ពីបរទេស (FDI) និងការចំណាយលើហេដ្ឋារចនាសម្ព័ន្ធបានថយចុះមកនៅត្រឹម ៥,៣% ក្នុងឆ្នាំ២០២៥ ពី ៦,០% ក្នុងឆ្នាំ២០២៤។ ទន្ទឹមនឹងនេះតម្រូវការក្នុងស្រុក វិស័យសំណង់ និងអចលនទ្រព្យ នៅតែមានសភាពទន់ខ្សោយ។
សេចក្តីប្រកាសព័ត៌មានរបស់ IMF ចេញផ្សាយក្នុងថ្ងៃទី៨ ខែកក្កដា ឱ្យដឹងថា៖«កំណើនសេដ្ឋកិច្ចកម្ពុជាត្រូវបានព្យាករថា នឹងថយចុះមកនៅត្រឹម ៣% ក្នុងឆ្នាំ២០២៦ មុននឹងងើបឡើងវិញនៅឆ្នាំ២០២៧ ខណៈតម្លៃថាមពលកើនឡើង តម្រូវការខាងក្រៅចុះខ្សោយ និងផលប៉ះពាល់ដល់កេរ្តិ៍ឈ្មោះរបស់ប្រទេសដែលពាក់ព័ន្ធនឹងសកម្មភាពឆបោកតាមអនឡាញ (Scam Activities) កំពុងដាក់សម្ពាធលើសកម្មភាពសេដ្ឋកិច្ច វិស័យទេសចរណ៍ និងបង្កហានិភ័យដល់ស្ថិរភាពហិរញ្ញវត្ថុ»។
IMF បានឱ្យដឹងទៀតថា សម្រាប់អតិផរណាជាមធ្យមដែលមានអត្រា ២,៥% ក្នុងឆ្នាំ២០២៥ គឺបានកើនឡើងយ៉ាងឆាប់រហ័សនៅខែឧសភា ឆ្នាំ២០២៦ ហើយត្រូវបានព្យាករថានឹងមានជាមធ្យម ៥,៦% សម្រាប់ឆ្នាំ២០២៦ ដោយសារផលប៉ះពាល់ពីការកើនឡើងនៃតម្លៃថាមពល។ អតិផរណាត្រូវបានរំពឹងថានឹងថយចុះវិញនៅឆ្នាំ២០២៧ ខណៈប្រាក់រៀលនៅតែមានស្ថិរភាពជាទូទៅ និងបន្តដើរតួនាទីជាបង្គោលមួយសម្រាប់សេដ្ឋកិច្ច។
ជាមួយគ្នានេះស្ថានភាពវិស័យខាងក្រៅក៏បានចុះខ្សោយក្នុងឆ្នាំ២០២៥ ដោយសមតុល្យគណនីចរន្តបានផ្លាស់ប្តូរពីអតិរេកតិចតួចទៅជាឱនភាព ព្រោះការនាំចូលបានកើនលឿនជាងការនាំចេញ ហើយប្រាក់បញ្ញើពីខាងក្រៅរបស់ពលករបានធ្លាក់ចុះ បន្ទាប់ពីពលករចំណាកស្រុកបានវិលត្រឡប់មកប្រទេសវិញ។ ការវិនិយោគផ្ទាល់ពីបរទេសនៅតែមានភាពរឹងមាំ ខណៈទុនបម្រុងអន្តរជាតិនៅតែស្ថិតក្នុងកម្រិតគ្រប់គ្រាន់ស្មើនឹងប្រមាណ ៨ ខែនៃការនាំចូល។
IMF បញ្ជាក់ថា៖«ហានិភ័យចំពោះទស្សនវិស័យសេដ្ឋកិច្ចមានទិសដៅអវិជ្ជមានចំពោះកំណើន និងមានទិសដៅវិជ្ជមានចំពោះអតិផរណា។ ការកើនឡើង ឬភាពប្រែប្រួលខ្លាំងនៃតម្លៃថាមពល ផលប៉ះពាល់សេដ្ឋកិច្ចពីបាតុភូតអែលនីញ៉ូ (El Niño) ភាពមិនច្បាស់លាស់នៃគោលនយោបាយពាណិជ្ជកម្ម និងតម្រូវការទេសចរណ៍ដែលចុះខ្សោយ អាចប៉ះពាល់ដល់សកម្មភាពសេដ្ឋកិច្ច។ នៅក្នុងប្រទេសភាពងាយរងគ្រោះរបស់វិស័យហិរញ្ញវត្ថុ ភាពទន់ខ្សោយនៃវិស័យអចលនទ្រព្យ និងការធ្លាក់ចុះគុណភាពទ្រព្យសកម្ម នៅតែជាហានិភ័យសំខាន់»។
ជាមួយគ្នានេះ IMF ក៏បានផ្តល់នូវអនុសាសន៍ណែនាំមួយចំនួន ដូចជា៖
ក្នុងបរិបទនេះ គោលនយោបាយសារពើពន្ធគួរជួយសម្រួលផលប៉ះពាល់ក្នុងរយៈពេលខ្លី។ វិធានការគាំទ្រគួរមានលក្ខណៈបណ្តោះអាសន្ន និងផ្តោតលើគ្រួសារងាយរងគ្រោះ និងអាជីវកម្មដែលរងផលប៉ះពាល់ ដោយជៀសវាងការបង្កសម្ពាធបន្ថែមលើអតិផរណា។ ការគាំទ្រទាក់ទងនឹងប្រេងឥន្ធនៈជាទូទៅ មានលក្ខណៈមិនផ្តល់អត្ថប្រយោជន៍សមធម៌ ហើយគួរត្រូវបានដកចេញជាបណ្តើរៗ ដើម្បីការពារចំណូលសារពើពន្ធ នៅពេលស្ថានភាពអនុញ្ញាត។
ក្នុងរយៈពេលមធ្យម យុទ្ធសាស្ត្រប្រមូលចំណូលដែលមានភាពជឿជាក់ គឺមានសារៈសំខាន់សម្រាប់រក្សាការចំណាយលើវិស័យអាទិភាព និងការបែងចែកថវិកាដើម្បីសម្រេចគោលដៅអភិវឌ្ឍន៍របស់ប្រទេស ខណៈរក្សានិរន្តរភាពបំណុល។ យុទ្ធសាស្ត្រនេះគួររួមមាន ការពង្រឹងការអនុវត្តតាមច្បាប់ពន្ធ ការកែលម្អអភិបាលកិច្ចលើការលើកលែងពន្ធ និងការពង្រីកមូលដ្ឋានពន្ធ។
ការរក្សាស្ថិរភាពហិរញ្ញវត្ថុនៅតែជាអាទិភាពសំខាន់។ ការបញ្ចប់វិធានការបន្ធូរបន្ថយបទប្បញ្ញត្តិជាទូទៅ គឺជាជំហានដ៏សំខាន់មួយ។ វិស័យអចលនទ្រព្យនៅតែជាចំណុចងាយរងគ្រោះសំខាន់ ដោយសារមានការពាក់ព័ន្ធយ៉ាងជិតស្និទ្ធជាមួយតារាងតុល្យការរបស់គ្រួសារ ធនាគារ ក្រុមហ៊ុនអភិវឌ្ឍន៍ និងអាជីវកម្មពាក់ព័ន្ធ។ ធនាគារជាតិនៃកម្ពុជា បានអនុវត្តវិធានការអន្តរាគមន៍ត្រួតពិនិត្យជាមុន ហើយគួរបន្តធានាឱ្យមានការទទួលស្គាល់ការខាតបង់ទាន់ពេលវេលា និងការធ្វើសំវិធានគ្រប់គ្រាន់។
ក្នុងក្របខ័ណ្ឌគ្រប់គ្រងវិបត្តិ និងការដោះស្រាយបញ្ហា ធនាគារគួរត្រូវបានដាក់ឱ្យដំណើរការពេញលេញដោយផ្តល់ជំនួយសាច់ប្រាក់បន្ទាន់តែចំពោះស្ថាប័នដែលនៅមានសមត្ថភាពទូទាត់បំណុល និងមានវិធានការការពារសមស្រប។
IMF បានអះអាងថា៖«កំណែទម្រង់រចនាសម្ព័ន្ធគឺមានសារៈសំខាន់ណាស់ក្នុងការពង្រឹងគំរូកំណើន និងភាពធន់របស់សេដ្ឋកិច្ចកម្ពុជា ជាពិសេសនៅពេលប្រទេសកំពុងត្រៀមខ្លួនចាកចេញពីឋានៈជាប្រទេសអភិវឌ្ឍន៍តិចតួចបំផុត (LDC)។ អាទិភាពរួមមាន ការកែលម្អបរិយាកាសធុរកិច្ច ការពង្រឹងអភិបាលកិច្ច និងនីតិរដ្ឋ ការអភិវឌ្ឍជំនាញ និងសមត្ថភាពស្រូបយកកម្លាំងពលកម្ម ការគាំទ្រការធ្វើពិពិធកម្មការនាំចេញ និងការទាក់ទាញការវិនិយោគដែលមានគុណភាពខ្ពស់។ ការពង្រឹងសន្តិសុខថាមពល និងប្រសិទ្ធភាពថាមពល ការបង្កើនភាពធន់នឹងការប្រែប្រួលអាកាសធាតុ និងកំណែទម្រង់ដើម្បីគាំទ្រថាមពលកកើតឡើងវិញ ក៏នឹងជួយបង្កើនសមត្ថភាពប្រកួតប្រជែងផងដែរ»៕
