ក្រុមឧក្រិដ្ឋជន ដែលបានប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) យ៉ាងសកម្ម នៅលើទឹកដីក្រុងប៉ោយប៉ែត ខេត្តបន្ទាយមានជ័យ បានបំបែកខ្លួន និងនាំគ្នាទៅសម្ងំលាក់ខ្លួន បន្តប្រព្រឹត្តបទល្មើសនេះ នៅក្រុងសិរីសោភ័ណ ហើយអាជ្ញាធរខេត្ត បានដាក់បទបញ្ជាតាមបោកសម្អាតក្រុមនេះឱ្យអស់។
លោក អ៊ុំ រាត្រី អភិបាលខេត្តបន្ទាយមានជ័យ បានដាក់បទបញ្ជាយ៉ាងម៉ឹងម៉ាត់ទៅដល់ក្រុង-ស្រុកទាំងអស់ ព្រមទាំង មេឃុំ-ចៅសង្កាត់ និងភូមិទូទាំងខេត្ត ត្រូវបន្តបោសសម្អាតករណីឆបោកតាមប្រព័ន្ធបច្ចេកវិទ្យា ដែលក្រុមនេះបានធ្វើការផ្តាច់ខ្លួនពីក្រុមធំៗ មកជាក្រុមតូច ហើយកំពុងបង្កប់ខ្លួននៅតាមផ្ទះសំណាក់ និងតាមរថយន្តជាដើម។
ការដាក់បទបញ្ជាបែបនេះ ត្រូវបានធ្វើឡើង នៅពេលលោកបានដឹកនាំកិច្ចប្រជុំពិភាក្សាការងារកិច្ចមួយចំនួន ជាមួយអភិបាលរងខេត្ត អភិបាល ក្រុង-ស្រុក ចំនួន៨ (ក្នុងចំណោម៩ក្រុង-ស្រុក) រួមនឹងមេឃុំ-ចៅសង្កាត់ នៅសាលប្រជុំសាលាបន្ទាយមានជ័យ កាលពីថ្ងៃទី៧ ខែកក្កដា ឆ្នាំ ២០២៦។
លោក អ៊ុំ រាត្រី បានលើកឡើងពីការរកឃើញ និងចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា នៅក្នុងភូមិសាស្រ្តក្រុងសិរីសោភ័ណ កាលពីពេលថ្មីៗនេះ ដោយលោកបញ្ជាក់ថា «ក្រុមឧក្រិដ្ឋជនបានបំបែកខ្លួនពីក្រុងប៉ោយប៉ែត មកសម្ងំលាក់ខ្លួនប្រព្រឹត្តការឆបោក Online Scams នៅក្រុងសិរីសោភ័ណ ហើយអាជ្ញាធរ និងសមត្ថកិច្ច កំពុងបន្តស្រាវជ្រាវទីតាំងសង្ស័យបន្ថែមទៀត ដើម្បីធ្វើការបង្ក្រាបបោសសម្អាតឱ្យអស់»។
ដើម្បីសម្រេចកិច្ចការងារនេះ លោក អ៊ុំ រាត្រី បានណែនាំ និងដាក់បទបញ្ជាដល់ក្រុង-ស្រុក ជាពិសេសមេឃុំ-ចៅសង្កាត់ និងភូមិ ត្រូវសហការក្នុងការចុះស្រង់ទិន្នន័យចំនួនជនបរទេស ដែលស្ថិតនៅក្នុងមូលដ្ឋានរបស់ខ្លួន ហើយបើសិនមានករណីសង្ស័យថា មានកន្លែងលួចបង្កប់ការឆបោក Online Scams ត្រូវរាយការណ៍មកអាជ្ញាធរមានសមត្ថកិច្ច ដើម្បីធ្វើការចុះប្រតិបត្តិការបង្ក្រាបឱ្យបានទាន់ពេលវេលា។
ជាមួយគ្នានេះ លោកអភិបាលខេត្ត បានប្រាប់ទៅអាជ្ញាធរពាក់ព័ន្ធ ឱ្យបន្តផ្សពវផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាល ស្តីពីការគ្រប់គ្រង សន្តិសុខសុវត្ថិភាពតាមទីតាំងរស់នៅប្រមូលផ្តុំ ដល់ម្ចាស់ទីតាំងសណ្ឋាគារ និងផ្ទះសំណាក់ ដើម្បីចូលរួមសហការជាមួយអាជ្ញាធរ និងរាយការពីជនបរទេសដែលមកស្នាក់នៅ។
នៅត្រង់ចំណុចនេះ លោក អ៊ុំ រាត្រី បានសង្កត់ធ្ងន់ថា ប្រសិនបើរកឃើញម្ចាស់ទីតាំងណា ផ្តល់ទីតាំងឱ្យជនបរទេសស្នាក់នៅប្រព្រឹត្តការឆបោកតាមប្រព័ន្ធបច្ចេកវិទ្យា ត្រូវប្រឈមទៅនឹងការផ្តន្ទាទោសតាមផ្លូវច្បាប់។
គួររំឭកថា ទីក្រុងប៉ោយប៉ែត ខេត្តបន្ទាយមានជ័យ បានក្លាយជាទីតាំងចុងក្រោយ ដែលផ្ទុះខ្លាំងលើករណីការឆបោកតាមប្រព័ន្ធបច្ចេកវិទ្យា និងបទល្មើសផ្សេងៗទៀត ហើយកម្លាំងសមត្ថកិច្ចចម្រុះ បានចុះត្រួតពិនិត្យ និងបង្រ្កាបជាបន្តបន្ទាប់ ដោយចាប់បានជនសង្ស័យ និងជនល្មើសសរុបរាប់ពាន់នាក់ យកទៅផ្ទន្ទាទោស ខណៈជនបរទេសពាក់ព័ន្ធមួយចំនួនធំ ត្រូវបានកសាងសំណុំបែបបទបញ្ជូនទៅកាន់ប្រទេសកំណើតរបស់ពួកគេវិញ។
ជាមួយគ្នានេះ កាស៊ីណូ មួយចំនួន នៅក្រុងប៉ោយប៉ែត ត្រូវបានសមត្ថកិច្ច និងស្ថាប័នពាក់ព័ន្ធ សម្រេចដកហូតអាជ្ញាបណ្ណវិញ បន្ទាប់ពីបានរកឃើញថា បានពាក់ព័ន្ធនឹងបទល្មើស Online Scams ហើយបទល្មើសនេះ នៅតែបន្តកើតមាន គ្រាន់តែបានផ្តាច់ខ្លួនពីក្រុមធំ ទៅជាក្រុមតូច ដោយអាជ្ញាធរខេត្តបន្ទាយមានជ័យ បានដាក់វិធានការ ត្រូវតាមបោកសម្អាតឱ្យអស់ពីទឹកដី នៅជាប់ព្រំដែនមួយនេះ៕
