រដ្ឋាភិបាលជប៉ុន បានសម្រេចផ្តល់ហិរញ្ញប្បទានឥតសំណង ដោយមានទឹកប្រាក់សរុបចំនួន ៤១៦លានយ៉េន (ប្រមាណ២.៨លានដុល្លារអាមេរិក) សម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស នៅក្នុងប្រទេសកម្ពុជា ហើយគម្រោងនេះ នឹងផ្ដល់ឱកាសដល់មន្ត្រីរាជការវ័យក្មេងរបស់កម្ពុជា បន្តការសិក្សាថ្នាក់ក្រោយឧត្តមសិក្សា នៅតាមសាកលវិទ្យាល័យល្បីល្បាញនានានៅក្នុងប្រទេសជប៉ុន។
លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងលោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា បានចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្តីពីការផ្តល់ហិរញ្ញប្បទានឥតសំណងរបស់រដ្ឋាភិបាលជប៉ុននេះ កាលពីថ្ងៃទី ៨ ខែកក្កដា ឆ្នាំ ២០២៦។
ក្រសួងការបរទេស បានបញ្ជាក់ថា ការហិរញ្ញប្បទានឥតសំណងនេះ «ឆ្លុះបញ្ចាំងយ៉ាងច្បាស់ពីការប្តេជ្ញាចិត្តយ៉ាងមុតមាំរបស់ប្រទេសជប៉ុន ក្នុងការគាំទ្រដល់ការអភិវឌ្ឍធនធានមនុស្សរបស់កម្ពុជា ជំរុញការអភិវឌ្ឍសង្គម-សេដ្ឋកិច្ចកម្ពុជា ព្រមទាំងលើកកម្ពស់បន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំង២»។
ចំណែកលោក UENO Atsushi បានអះអាងថា ការចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្តីពីការផ្តល់ហិរញ្ញប្បទានឥតសំណងរបស់រដ្ឋាភិបាលជប៉ុន ជូនដល់កម្ពុជា ដោយមានទឹកប្រាក់ប្រមាណ២.៨លានដុល្លារអាមេរិកលើកនេះ គឺដើម្បីជាមូលនិធិផ្តល់ឱកាសសម្រាប់មន្ត្រីរដ្ឋាភិបាលវ័យក្មេងកម្ពុជា ក្នុងការសិក្សានៅសាលា បញ្ចប់ការសិក្សានៅប្រទេសជប៉ុន។
លោកបានរំឭកថា ចាប់តាំងពីឆ្នាំ ២០០១មក មន្ត្រីរដ្ឋាភិបាលកម្ពុជាជិត ៦០០នាក់ បានសិក្សានៅប្រទេសជប៉ុនក្រោមគម្រោងនេះ ហើយចាប់តាំងពីដើមទសវត្សរ៍ឆ្នាំ ១៩៩០ ប្រទេសជប៉ុនបានគាំទ្រប្រទេសកម្ពុជាក្នុងការសម្រេចបាននូវសន្តិភាព និងការកសាងឡើងវិញក្រោយជម្លោះ, ការកសាងប្រទេសជាតិ និងការអភិវឌ្ឍសេដ្ឋកិច្ចសង្គម។
លោក UENO Atsushi បានបន្ថែមថា នៅក្នុងចំណោមគំនិតផ្តួចផ្តើមជាច្រើនដែលប្រទេសជប៉ុនបានសហការជាមួយប្រទេសកម្ពុជា ការអប់រំតែងតែជាអាទិភាពខ្ពស់បំផុតមួយ ហើយនេះដោយសារតែយើងទទួលស្គាល់ថា ធនធានមនុស្សដែលមានគុណភាពខ្ពស់ គឺជាមូលដ្ឋានគ្រឹះនៃការកសាងប្រទេសជាតិ។
«ខ្ញុំសង្ឃឹមថា កម្មវិធីអាហារូបករណ៍ដែលយើងបានចុះហត្ថលេខានៅថ្ងៃនេះ នឹងគាំទ្រដល់កិច្ចខិតខំប្រឹងប្រែងរបស់ប្រទេសកម្ពុជាក្នុងការពន្លឿនការអភិវឌ្ឍធនធានមនុស្ស ហើយការណ៍នេះនឹងបើកផ្លូវឱ្យប្រទេសកម្ពុជា ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០»។
លោក UENO Atsushi បានបន្ថែមទៀតថា ចំណេះដឹង និងជំនាញ ដែលអ្នកទទួលអាហារូបករណ៍ នឹងទទួលបាននៅក្នុងប្រទេសជប៉ុន និងបណ្តាញដែលពួកគេអាចកសាងបាន មិនត្រឹមតែរួមចំណែកដល់ការអភិវឌ្ឍជាតិរបស់ប្រទេសកម្ពុជាប៉ុណ្ណោះទេ ប៉ុន្តែថែមទាំងនឹងពង្រឹងបន្ថែមទៀតនូវចំណងមិត្តភាព និងការជឿទុកចិត្តយូរអង្វែងដែលមានរវាងប្រទេសយើងទាំង២។
លោកបានសង្កត់ធ្ងន់ថា៖ «ប្រទេសជប៉ុននៅតែប្តេជ្ញាចិត្ត ក្រោម “ភាពជាដៃគូយុទ្ធសាស្ត្រដ៏ទូលំទូលាយ” ដើម្បីគាំទ្រដល់ការអភិវឌ្ឍប្រកបដោយចីរភាពរបស់ប្រទេសកម្ពុជា។ រួមគ្នាជាមួយរាជរដ្ឋាភិបាលកម្ពុជា យើងនឹងបន្តរួមគ្នាបង្កើតតម្លៃសង្គម និងដោះស្រាយបញ្ហាប្រឈមក្នុងតំបន់ និងសកលលោក»៕
