Author: ngochecktay

ខេត្តបន្ទាយមានជ័យ: ក្រសួងព័ត៌មានបានអំពាវនាវឱ្យពង្រឹងកិច្ចសហការរវាងមន្ទីរព័ត៌មានរាជធានី-ខេត្ត និងអ្នកសារព័ត៌មាននៅទូទាំងប្រទេស ដើម្បីធានាការផ្សព្វផ្សាយព័ត៌មានប្រកបដោយវិជ្ជាជីវៈ និងទប់ស្កាត់ការផ្សាយព័ត៌មានដែលអាចប៉ះពាល់ដល់សន្តិសុខជាតិ បន្ទាប់ពីអាជ្ញាធរបានលើកឡើងពីបទពិសោធន៍កន្លងមក ដែលអ្នកសារព័ត៌មានមួយចំនួនបានផ្សាយព័ត៌មានពាក់ព័ន្ធនឹងកិច្ចការយោធាដោយខ្វះការប្រុងប្រយ័ត្ន។ ការអំពាវនាវនេះត្រូវបានធ្វើឡើងដោយលោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ក្នុងកិច្ចប្រជុំតម្រង់ទិសស្តីពី «ការងារព័ត៌មាន និងសាធារណមតិ» ជូនមន្ត្រីរាជការនៃមន្ទីរព័ត៌មានខេត្តបន្ទាយមានជ័យ កាលពីរសៀលថ្ងៃទី១៥ ខែកក្កដា។ លោកបានជំរុញឱ្យមន្ទីរព័ត៌មានខេត្តបន្ទាយមានជ័យ ពង្រឹងកិច្ចសហប្រតិបត្តិការ និងកសាងទំនាក់ទំនងល្អជាមួយអ្នកសារព័ត៌មានក្នុងមូលដ្ឋាន ក៏ដូចជាអ្នកសារព័ត៌មានដែលចុះបំពេញបេសកកម្មពីបណ្ដាខេត្តផ្សេងៗ ដើម្បីធានាថា ព័ត៌មានដែលផ្សព្វផ្សាយជូនសាធារណជន មានភាពត្រឹមត្រូវ និងអាចទុកចិត្តបាន ជាពិសេសលើប្រធានបទពាក់ព័ន្ធនឹងកិច្ចការយោធា និងការការពារបូរណភាពទឹកដីកម្ពុជា។ បើតាមលោក អស្នារិទ្ធ ការស្វែងយល់ពីតម្រូវការរបស់អ្នកសារព័ត៌មាន និងការសម្របសម្រួលជាប្រចាំរវាងមន្ទីរព័ត៌មាន អាជ្ញាធរ និងអ្នកសារព័ត៌មាន គឺជាកត្តាសំខាន់ក្នុងការលើកកម្ពស់គុណភាពវិជ្ជាជីវៈ និងជួយឱ្យការរាយការណ៍ព័ត៌មានពាក់ព័ន្ធនឹងសន្តិសុខជាតិ ប្រព្រឹត្តទៅដោយទំនួលខុសត្រូវ។ លោកបានបញ្ជាក់ថា កិច្ចសហការនេះគួរធ្វើឡើងជាប្រចាំ ដើម្បីគាំទ្រដល់ការបំពេញការងាររបស់អ្នកសារព័ត៌មាន តាមរយៈការសម្របសម្រួលឱ្យអាចចុះយកព័ត៌មាន សម្ភាសមន្ត្រីជំនាញ អាជ្ញាធរ និងភាគីពាក់ព័ន្ធបានកាន់តែងាយស្រួល។ លោកបានបន្ថែមថា ការផ្តល់ព័ត៌មានឱ្យបានទាន់ពេលវេលា និងគ្រប់ជ្រុងជ្រោយ នឹងជួយកាត់បន្ថយការផ្សាយព័ត៌មានខុសឆ្គង ដែលអាចនាំឱ្យមានប្រតិកម្មសាធារណៈ ឬបញ្ហាផ្លូវច្បាប់ជាយថាហេតុ។ ជាមួយគ្នានេះ អ្នកនាំពាក្យក្រសួងព័ត៌មានបានលើកទឹកចិត្តឱ្យអ្នកសារព័ត៌មានទាំងអស់ សហការជាមួយអាជ្ញាធរ និងមន្ទីរព័ត៌មានទាំង ២៥ រាជធានី-ខេត្ត ដើម្បីកសាងវប្បធម៌នៃការសម្របសម្រួល និងផ្សព្វផ្សាយព័ត៌មានពិតប្រកបដោយភាពត្រឹមត្រូវ។ លោកបានលើកឡើងថា: “គោលដៅសំខាន់ គឺធានាឱ្យការផ្សព្វផ្សាយព័ត៌មានប្រព្រឹត្តទៅដោយការទទួលខុសត្រូវ មិនប៉ះពាល់ដល់សន្តិសុខជាតិ កិត្តិយសបុគ្គល និងស្របតាមក្រមសីលធម៌វិជ្ជាជីវៈ”។ លោក អស្នារិទ្ធ បានលើកយកបទពិសោធន៍ក្នុងអំឡុងពេលមានភាពតានតឹងតាមបណ្ដោយព្រំដែនកម្ពុជា-ថៃ មកធ្វើជាឧទាហរណ៍ ដោយបញ្ជាក់ថា ក្រសួងព័ត៌មានបានកត់សម្គាល់ឃើញអ្នកសារព័ត៌មានមួយចំនួនតូច ផ្សាយព័ត៌មានដែលប៉ះពាល់ដល់សន្តិសុខជាតិ និងអាថ៌កំបាំងយោធា។ លោកថ្លែងថា៖ «ជាមេរៀនកន្លងមក ក្នុងអំឡុងពេលមានការរំលោភបំពានលើបូរណភាពទឹកដីពីសំណាក់ភាគីថៃ ក្រសួងព័ត៌មានបានកត់សម្គាល់ឃើញអ្នកសារព័ត៌មានមួយចំនួនតូចបានវង្វេងសមរភូមិ ដោយផ្សាយព័ត៌មានប៉ះពាល់ដល់សន្តិសុខជាតិ និងអាថ៌កំបាំងយោធា។ ការផ្សព្វផ្សាយដោយខ្វះការប្រុងប្រយ័ត្នបែបនេះ វាបានក្លាយជាបន្ទុក និងបង្កផលវិបាកយ៉ាងធ្ងន់ធ្ងរទៅវិញ»។ លោកបានបន្តថា ការរួមគ្នាក្នុងក្របខណ្ឌកិច្ចសហការ និងការសម្របសម្រួល មិនត្រឹមតែជួយលើកកម្ពស់សមត្ថភាព និងវិជ្ជាជីវៈរបស់អ្នកសារព័ត៌មានប៉ុណ្ណោះទេ ប៉ុន្តែថែមទាំងជាកាតព្វកិច្ចរួមក្នុងការការពារផលប្រយោជន៍ជាតិផងដែរ។ ប្រធានមន្ទីរព័ត៌មានខេត្តបន្ទាយមានជ័យ លោក សេក សុខុម បានសម្តែងការគាំទ្រចំពោះការណែនាំរបស់ក្រសួងព័ត៌មាន និងបញ្ជាក់ថា មន្ទីរបានត្រៀមខ្លួនរួចជាស្រេចក្នុងការសហការយ៉ាងជិតស្និទ្ធជាមួយអ្នកសារព័ត៌មានមកពីគ្រប់ទិសទី ដែលចុះបំពេញបេសកកម្មក្នុងខេត្ត។ លោកបានប្តេជ្ញាថា មន្ទីរនឹងបន្តសម្របសម្រួលជាមួយអាជ្ញាធរ និងស្ថាប័នពាក់ព័ន្ធ ដើម្បីជួយសម្រួលដល់ការចុះយកព័ត៌មាន និងការសម្ភាសរបស់អ្នកសារព័ត៌មាន…

ក្រុមកីឡាការិនី​ជម្រើសជាតិបាល់​ទាត់​កម្ពុជា ដណ្តើម​បាន​កៅអី​ឡើង​ទៅវគ្គ​ពាក់​កណ្តាល​ផ្តាច់​ព្រ័ត្រ នៃ​ពានរង្វាន់ AFF Women’s Cup 2026 ជា​ថ្មី​ម្តងទៀត បន្ទាប់ពីពួកគេ បានបញ្ចប់ការ​ប្រកួតជម្រុះ​ក្នុង​ពូល ដោយ​ទទួលបានលេខ​១​នោះ ប៉ុន្តែការ​ស្វែង​រក​ឱកាស​ឡើង​ទៅវគ្គ​បន្ត​របស់​ក្រុមកីឡាករជម្រើសជាតិ​បាល់​ទះ​កម្ពុជា ក្នុង​ព្រឹត្តិការណ៍ SEA V-Cup 2026 កំពុង​ស្ថិតក្នុង​ភាពមិនច្បាស់​លាស់ បន្ទាប់ពីពួកគេ បានចាញ់​ក្រុម​ជើងឯក ឥណ្ឌូនេស៊ី ៣សិតដាច់ (៣-០)នោះ។ សម្រាប់​ការ​ប្រកួត​ពាន​រង្វាន់ AFF Women’s Cup 2026 ដែលកំពុង​​ធ្វើ​នៅប្រទេស​ម៉ាឡេស៊ី​នេះ ​ក្រុមកីឡាការិនីជម្រើសជាតិ​កម្ពុជា បានបញ្ចប់​ការ​ប្រកួតជម្រុះ​ក្នុងពូល B ដោយបាន​យក​ឈ្នះ​ក្រុមទីម័រខាងកើត ៣-១ នៅថ្ងៃ​បើក​ឆាក និង​បានវាយបក​តាមស្មើ​ក្រុមការពារ​តំណែង​ជើងឯក ឥណ្ឌូនេស៊ី ១-១ សម្រាប់​ការ​ប្រកួត​ចុង​ក្រោយ កាលពីល្ងាច​ថ្ងៃព្រហស្បតិ៍។ កីឡាការិនី វិបុល សិរីសេដ្ឋា ជាអ្នកតែត​បាល់បញ្ចូល​ទី​ឱ្យក្រុមនារីកម្ពុជា នៅនាទីទី ៤៧ ដើម្បី​លុប​ចោល​គ្រាប់បាល់នាំមុខ​របស់ឥណ្ឌូនេស៊ី ដែល​រក​បាន​ដោយកីឡាការិនី Sheva Imut Furyzcha នៅនាទីទី ៤២។ ការ​ចែក​គ្នា​ម្នាក់​១ពិន្ទុ​នេះ បានជួយ​ឱ្យ​ក្រុម​នារីកម្ពុជា ទទួលបាន​ចំណាត់​ថ្នាក់លេខ​១ ប្រចាំពូល B ខណៈ​ក្រុមនារី​ឥណ្ឌូនេស៊ី ឈរនៅលេខ​២ ដោយមាន​៤ពិន្ទុ​ស្មើ​គ្នា ហើយ​លទ្ធផល​នេះ គឺដូចគ្នា​ទៅនឹងការ​ប្រកួត​ពាន AFF Women’s Cup 2024 តែម្តង ព្រោះ​កាល​នោះ ក្រុមនារី​កម្ពុជា និងឥណ្ឌូនេស៊ី បាន​ស្មើ​គ្នា ០-០ និងបាន​យក​ឈ្នះ​ក្រុមកីឡាការិនីជម្រើសជាតិម៉ាឡេស៊ី ដូចគ្នា។ យោង​តាម​លទ្ធផលនេះ ​ក្រុមនារី​កម្ពុជា ត្រូវ​ឡើង​ទៅ​ជួប​​ក្រុមកីឡាការិនីជម្រើសជាតិ​ឡាវ នៅ​វគ្គពាក់​កណ្តាល​ផ្តាច់​ព្រ័ត្រ ដែល​ទទួលបាន​លេខ​២​ប្រចាំពូល A មាន ២ពិន្ទុ រីឯ​ ឥណ្ឌូនេស៊ី ត្រូវប៉ះ​ក្រុម​ជម្រើសជាតិនារី​សិង្ហបុរី ដែល​ដណ្តើមបាន​លេខ​១ ប្រចាំពូល A បន្ទាប់ពីពួកគេ បានទម្លាក់​ក្រុមម្ចាស់​ផ្ទះ​ម៉ាឡេស៊ី ដោយការយក​ឈ្នះ ៣-១ ក្នុងជំនួប​ចុង​ក្រោយ កាលពី​ម្សិលមិញ​ដែរ ហើយ​ការ​ប្រកួត​វគ្គពាក់កណ្តាល​ផ្តាច់​ព្រ័ត្រនេះ នឹង​ធ្វើ​នៅ​ថ្ងៃទី ១៩ ខែកក្កដា​នេះ។ ក្តីសង្ឃឹមឡើង​ទៅកាន់​វគ្គ​បន្ត​របស់​ក្រុម​បាល់​ទះកម្ពុជា កំពុង​ស្ថិតក្នុង​ភាពមិនច្បាស់​លាស់…

គណៈបញ្ជាការឯកភាពរដ្ឋបាលខណ្ឌសែនសុខ ចូលរួមជាមួយកម្លាំងនាយកដ្ឋានប្រឆាំងបទល្មើសបច្ចេកវិទ្យា​ នៃអគ្គស្នងការដ្ឋាន​នគរបាលជាតិ និង​ព្រះរាជអាជ្ញា បាន​ចុះ​ពិនិត្យ​ទីតាំង​២កន្លែង​នៅ​ខណ្ឌ​សែនសុខ រាជធានីភ្នំពេញ រក​ឃើញ​ទូរស័ព្ទ​និង​កុំព្យូទ័រ​ជិត ២០០០គ្រឿងដែល​សង្ស័យ​ថា​ពាក់​ព័ន្ធ​នឹង​ online scam។ រដ្ឋបាល​ខណ្ឌសែនសុខ បាន​ឲ្យ​ដឹង​នៅ​ថ្ងៃទី១៦ កក្កដា​ថា ប្រតិបត្តិការ​នៅ​ថ្ងៃទី​១៦ កក្កដា​កន្លងទៅ ធ្វើ​ឡើង​នៅ​ទីតាំង​សង្ស័យ​ចំនួន២ គឺ​ទី១ ស្ថិត​នៅ​ផ្ទះល្វែងលេខ G-13 ផ្លូវហ្គូដឌី ក្នុងបរិវេណផ្សាររតនាផ្លាហ្សា ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ។ នៅ​ទីតាំង​ទី១​នេះ​ សមត្ថកិច្ច​បាន​ឃាត់ខ្លួន​ជនជាតិចិន ១នាក់ និងដកហូតវត្ថុតាង រួមមាន​ក្ដារចុច (Keyboard) ចំនួន ៨ប្រអប់, Mother board ចំនួន ១៩ ប្រអប់, ខ្សែ Network ចំនួន ២ ប្រអប់, ទូរស័ព្ទចំនួន ៤ប្រអប់, កុំព្យូទ័រយួរដៃ ចំនួន ៥ ប្រអប់, និង Adapter សម្រាប់​តភ្ជាប់ពី​ទូរស័ព្ទ​ទៅកុំព្យូទ័រ ចំនួន ៤ ប្រអប់។ ចំណែកប្រតិបត្តិការ​នៅ​​ទីតាំងទី២ ធ្វើឡើង​នៅ​​បុរីកាណាឌីយ៉ា ផ្ទះលេខ D21 ផ្លូវឌៀលណេស ភូមិទ្រុងមាន់ សង្កាត់អូរបែកក្អម ខណ្ឌសែនសុខ ឃាត់ខ្លួនជនជាតិចិន ២នាក់ និងដកហូតសម្ភារៈ រួម​មាន​ទូរស័ព្ទដៃ ចំនួន១៧៤០គ្រឿង, ស៊ីមកាត និងគ្រឿងបន្លាស់ទូរស័ព្ទ ជា​ច្រើន​ទៀត។ រដ្ឋបាល​ខណ្ឌសែនសុខថ្លែង​ថា៖ «តាមកោសល្យវិច័យរបស់មន្ត្រី​ជំនាញនាយកដ្ឋានប្រឆាំងបទល្មើសបច្ចេកវិទ្យា ជាប់ពាក់ព័ន្ធសង្ស័យរក្សាទុក និងផ្គត់ផ្គង់ឧបករណ៍បម្រើអោយបទល្មើស online scams។ ជនជាតិចិន និងសម្ភារវត្ថុតាងខាងលើ បញ្ជូនទៅនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ»៕

តើប្រទេសចិនអាចក្លាយជាអ្នកសម្របសម្រួលរវាងកម្ពុជា និងថៃ ខណៈភាពតានតឹងនៅតាមព្រំដែនជម្លោះរវាងប្រទេសទាំងពីរនៅតែបន្តឬ? សំណួរនេះកំពុងទទួលបានការចាប់អារម្មណ៍ជាថ្មី បន្ទាប់ពីលោកនាយករដ្ឋមន្ត្រី ហ៊ុន ម៉ាណែត បានប្រាប់លោក លី ឈាង នាយករដ្ឋមន្ត្រីនៃសាធារណរដ្ឋប្រជាមានិតចិន អំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ ក្នុងជំនួបទ្វេភាគីនៅទីក្រុងប៉េកាំង ខណៈលោក អនុទិន ចានវីរៈគុល នាយករដ្ឋមន្ត្រីថៃ បានថ្លែងដោយឡែកថា ទីក្រុងបាងកក «មិនបានបិទទ្វារ» ចំពោះតួនាទីរបស់ចិនក្នុងការជួយបន្ធូរបន្ថយភាពតានតឹងនោះទេ។ លោក ហ៊ុន ម៉ាណែត បានជួបពិភាក្សាជាមួយលោក លី ឈាង នៅថ្ងៃទី១៦ ខែកក្កដា ក្នុងអំឡុងពេលបំពេញទស្សនកិច្ចការងារនៅប្រទេសចិន និងចូលរួមសន្និសីទពិភពលោកស្តីពីបញ្ញាសិប្បនិម្មិត ឆ្នាំ២០២៦ (World Artificial Intelligence Conference – WAIC) ដែលក្នុងឱកាសនោះ មេដឹកនាំទាំងពីរបានបញ្ជាក់ជាថ្មីពីការប្តេជ្ញាចិត្តពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន។ យោងតាមសេចក្តីប្រកាសរបស់រាជរដ្ឋាភិបាលកម្ពុជា លោក ហ៊ុន ម៉ាណែត បានសង្កត់ធ្ងន់ថា៖ «កម្ពុជាបន្តប្តេជ្ញាចិត្តដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ និងអនុលោមតាមអនុសញ្ញា សន្ធិសញ្ញា និងកិច្ចព្រមព្រៀងដែលមានស្រាប់រវាងកម្ពុជា និងថៃ»។ ការពិភាក្សាអំពីបញ្ហាព្រំដែននេះ ត្រូវបានចាត់ទុកថា ជាឱកាសមួយក្នុងចំណោមកិច្ចពិភាក្សាកម្រិតខ្ពស់បំផុត ដែលកម្ពុជាបានលើកយកបញ្ហានេះជាផ្លូវការជាមួយថ្នាក់ដឹកនាំកំពូលរបស់ចិន ចាប់តាំងពីភាពតានតឹងនៅតាមព្រំដែនបានកើនឡើងកាលពីឆ្នាំមុន។ ចំណែកលោក លី ឈាង បានបញ្ជាក់សាជាថ្មីពីការគាំទ្ររបស់ទីក្រុងប៉េកាំងចំពោះកម្ពុជា និងបានពិពណ៌នាទំនាក់ទំនងរវាងប្រទេសទាំងពីរថា ជា «មិត្តដែកថែប»។ លោក លី បានថ្លែងថា៖ «ចិន និងកម្ពុជា មានទំនាក់ទំនងជិតស្និទ្ធជាមិត្តដែកថែប ហើយប្រទេសទាំងពីរនឹងបន្តគាំទ្រគ្នាទៅវិញទៅមក ដើម្បីជំរុញទំនើបកម្មរៀងៗខ្លួន និងរួមគ្នាឆ្លើយតបនឹងភាពមិនប្រាកដប្រជារបស់ពិភពលោក»។ លោកបានបន្ថែមថា «ចិនចាត់ទុកទំនាក់ទំនងជាមួយកម្ពុជា ជាអាទិភាពនៃការទូតរបស់ចិន» ដោយបញ្ជាក់ពីការប្តេជ្ញាចិត្តរបស់ទីក្រុងប៉េកាំងក្នុងការពង្រឹងកិច្ចសហប្រតិបត្តិការលើវិស័យជាច្រើន។ មេដឹកនាំទាំងពីរ ក៏បានឯកភាពពង្រីកកិច្ចសហប្រតិបត្តិការលើវិស័យនយោបាយ និងការទូត ពាណិជ្ជកម្ម និងវិនិយោគ ហេដ្ឋារចនាសម្ព័ន្ធតភ្ជាប់ ថាមពលបៃតង កសិកម្ម ការពារជាតិ និងសន្តិសុខ ព្រមទាំងវិស័យទេសចរណ៍ ការអប់រំ និងការផ្លាស់ប្តូរប្រជាជន និងប្រជាជន។ លោក ហ៊ុន ម៉ាណែត ក៏បានបញ្ជាក់ជាថ្មីពីការប្រកាន់ខ្ជាប់ដោយឥតងាករេនូវគោលការណ៍ «ចិនមួយ» ដោយចាត់ទុកបញ្ហាតៃវ៉ាន់ ហុងកុង ស៊ីចាំង និងស៊ីនជាំង…

ភ្នំពេញៈ ចាប់តាំងពីត្រីមាសទី៣ នៃឆ្នាំ២០២៥ រហូតមកដល់ពេលនេះ ប្រទេសកម្ពុជាបានសម្រេចសមិទ្ធផលជាប្រវត្តិសាស្ត្រ ក្នុងការលុបបំបាត់ការចម្លងជំងឺគ្រុនចាញ់ក្នុងស្រុក តាមរយៈការអនុវត្តផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ ឆ្នាំ២០១១-២០២៥។ នេះបើយោងតាមក្រសួងសុខភិបាលនៅថ្ងៃព្រហស្បតិ៍ ទី១៦ ខែកក្កដានេះ។ សមិទ្ធផលនេះ បានមកពីប្រសិទ្ធភាពនៃការអនុវត្តយុទ្ធសាស្ត្រក្នុងការរុករក ការព្យាបាល ការបង្ការ ការតាមដាន និងការធ្វើអន្តរាគមន៍លើករណីជំងឺគ្រុនចាញ់បានឆាប់ និងទាន់ពេលវេលា ដែលដឹកនាំអនុវត្តប្រកបដោយការទទួលខុសត្រូវខ្ពស់របស់ក្រសួងខាភិបាល រួមជាមួយអ្នកពាក់ព័ន្ធនៅគ្រប់កម្រិតនានា។ ក្នុងនោះរួមមាន អង្គការសុខភាពពិភពលោក (WHO) ព្រមទាំងក្រសួង ស្ថាប័ននានា អាជ្ញាធរ ដៃគូអភិវឌ្ឍន៍ វិស័យ ឯកជន និងសហគមន៍ទូទាំងប្រទេស ដើម្បីរួមចំណែកជាមួយរាជរដ្ឋាភិបាល ក្នុងការលើកកម្ពស់សុខុមាលភាពរបស់ប្រជាជន និងការអភិវឌ្ឍសេដ្ឋកិច្ច-សង្គម។ ទោះយ៉ាងណា ក្នុងបរិបទដែលប្រទេសកម្ពុជា កំពុងស្ថិតក្នុងដំណាក់កាល «ទប់ស្កាត់ការកកើតជំងឺគ្រុនចាញ់ឡើងវិញ” ដើម្បីឈានទៅទទួលវិញ្ញាបនបត្រលុបបំបាត់ជំងឺគ្រុនចាញ់នាឆ្នាំ២០៣០ ពីអង្គការសុខភាពពិភពលោក ប្រ​ទេស កម្ពុជាអាចនៅប្រឈមហានិភ័យ ចំពោះការនាំចូលជំងឺគ្រុនចាញ់ពីក្រៅប្រទេសផ្សេងទៀត ដែលកំពុងមានការ ចម្លងជំងឺគ្រុនចាញ់ តាមរយៈការធ្វើដំណើរផ្លាស់ទីរបស់ប្រជាជនប្រឈម ចូលមកប្រទេសកម្ពុជា រួមទាំងគ្រុន ចាញ់នាំចូលតាមរយៈសត្វស្វា។ ក្រសួងសុខាភិបាលបញ្ជាក់ថា៖«ក្នុងរយៈពេល ៦ខែដើមឆ្នាំ២០២៦ ប្រទេសកម្ពុជាមិនបានរកឃើញករណីជំងឺគ្រុនចាញ់ឆ្លងថ្មី ក្នុងស្រុកទេ បានន័យថាគ្រុន ចាញ់បានថយចុះ ១០០% និងពុំមានករណីស្លាប់ដោយសារជំងឺគ្រុនចាញ់ចាប់តាំងពីឆ្នាំ២០១៨ រហូតមកដល់បច្ចុប្បន្ននេះ»។ បច្ចុប្បន្ននេះ ប្រទេសកម្ពុជាកំពុងដំណើរការប្រព្រឹត្តទៅយ៉ាងសកម្មដ៏មានប្រសិទ្ធភាពក្នុងការតាមដាន និងរុក រកករណីជំងឺគ្រុនចាញ់ តាមរយៈប្រព័ន្ធរបាយការណ៍រហ័សទាន់ពេលវេលា ២៤ម៉ោង (real-time) ដែលមាននៅគ្រប់ បណ្តាភូមិសាស្ត្រ ក្នុងសហគមន៍ជាអ្នកស្ម័គ្រចិត្តព្យាបាលជំងឺគ្រុនចាញ់ភូមិ និងបណ្តាញសេវាសុខាភិបាល សាធារណៈ ជាប៉ុស្តិ៍សុខភាព មណ្ឌលសុខភាព មន្ទីរពេទ្យបង្អែក មន្ទីរពេទ្យខេត្ត និងមន្ទីរពេទ្យជាតិ ដើម្បីឈានទៅការឆ្លើយតបរហ័ស ២៤ម៉ោង និងការទប់ស្កាត់ការកើតឡើងវិញនៃជំងឺគ្រុនចាញ់បានទាន់ពេលវេលា។ ជាលទ្ធផលនៃប្រសិទ្ធភាពប្រព័ន្ធព័ត៌មានជំងឺគ្រុនចាញ់នេះ ជំងឺគ្រុនចាញ់ឆ្លងក្នុងស្រុកថ្មីនាឆ្នាំ២០២៦ ក៏កំពុងត្រូវ បានរកឃើញថា មិនមានករណីជំងឺគ្រុនចាញ់សង្ស័យណាមួយលេចចេញតាមបណ្តាព្រំដែនប្រទេសកម្ពុជានោះទេ។ ក្រសួងបានអំពាវនាវដល់សាធារណជន ឱ្យចូលរួមបង្ការជំងឺគ្រុនចាញ់ តាមរយៈការការពារខ្លួនកុំឱ្យមូសខាំ ត្រូវសម្រាន្តក្នុងមុងគ្រប់ពេល ស្វែងរកសេវាពិគ្រោះប្រឹក្សាយោបល់ ឬធ្វើតេស្តនិងព្យាបាលឱ្យបានទាន់ពេលវេលា តាមរយៈអ្នកស្ម័គ្រចិត្តភូមិព្យាបាលជំងឺគ្រុនចាញ់ ឬមូលដ្ឋាន សុខាភិបាលសាធារណៈដែលនៅជិតបំផុត ប្រសិនបើសង្ស័យថាបានឆ្លងជំងឺគ្រុនចាញ់៕

លំហូរពាណិជ្ជកម្ម​ទំនិញ​រវាង​​កម្ពុជា​ជាមួយ​នឹង​បណ្តា​ប្រទេស​​សមាជិក​នៃ​កិច្ច​ព្រម​ព្រៀង​​ភាពជាដៃគូសេដ្ឋកិច្ចគ្រប់ជ្រុងជ្រោយតំបន់​(RCEP) បាន​បោះ​ជំហាន​ទៅមុខ​កាន់​តែ​ប្រសើរ​​ ដោយនៅ​ក្នុង​ឆមាសទី​១ ឆ្នាំ​២០២៦ មាន​ទឹក​ប្រាក់​សរុប​ជាង ២៤ ពាន់លានដុល្លារ កើនជិត ១/៤​ដង​បើ​ធៀប​នឹង​ឆមាស​ទី​១ ឆ្នាំ​២០២៥។ RCEP គឺជាកិច្ចព្រមព្រៀងពាណិជ្ជកម្មលក្ខណៈ​តំបន់​ដែលផ្តួចផ្តើម​បង្កើត​ឡើងដោយប្រទេសសមាជិកអាស៊ានទាំង ១០ (ឆ្នាំ​២០១២)។ បច្ចុប្បន្ន RCEP មានសមាជិកចំនួន ១៥ ប្រទេស ដោយ ១០ ​ប្រទេស​ជាសមាជិកអាស៊ាន និងប្រទេស​ដៃគូ​សំខាន់​ៗ​ចំនួន ៥ ទៀត​រួមមាន ប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។ ទិន្នន័យ​ក្រសួងពាណិជ្ជកម្ម ​ឱ្យ​ដឹង​ថា ការធ្វើពាណិជ្ជកម្មទំនិញ​របស់ប្រទេស​កម្ពុជា ជាមួយក្រុម​ប្រទេស​សមាជិក RCEP នៅក្នុងឆមាសទី១ ឆ្នាំ២០២៦ មានទំហំទឹកប្រាក់សរុបជាង ២៤ ពាន់លានដុល្លារ កើនជិត ២៤% បើ​ធៀប​នឹង​រយៈ​ពេល​ដូចគ្នា​កាល​ពី​ឆ្នាំ​២០២៥ ដោយក្នុងនោះកម្ពុជានាំទំនិញ​ទៅកាន់ប្រទេសសមាជិក​ RCEP មានទឹកប្រាក់ជាង ៥,៦ ពាន់លានដុល្លារ កើនជិត ១២% ខណៈទំនិញ​នៃ​ក្រុមប្រទេស RCEP នាំចូល​មក​វិញ​មាន​ចំនួន​ជាង ១៨ ពាន់លានដុល្លារ កើន ២៨%។ បើ​ធ្វើ​ការ​បែងចែក គឺ​​ការដោះដូរពាណិជ្ជកម្មជាមួយ​ក្រុមប្រទេស​សមាជិក​អាស៊ាន មាន​ទឹកប្រាក់ប្រមាណ ១០ ពាន់លានដុល្លារ កើនជិត ២២% ដែល​ក្នុងនោះការ​នាំចេញ​របស់​កម្ពុជាមានទឹកប្រាក់​ប្រហែល​​ ៣ ពាន់លានដុល្លារ កើនឡើង ២% និង​កម្ពុជា​នាំ​ចូលពីទីផ្សារអាស៊ាន មាន​ចំនួន​ជាង ៧ ពាន់លានដុល្លារ កើន ៣៣%។ ដោយឡែកសម្រាប់​ប្រទេសជាសមាជិក RCEP ចំនួន ៥ ផ្សេងទៀត(ក្រៅ​សំបន់​អាស៊ាន) គឺ​​កម្ពុជា-ចិន មានទឹកប្រាក់ ១១,៦៤ ពាន់លានដុល្លារ កើនឡើង ២៥,៤%, កម្ពុជា-ជប៉ុន ១,៤៣ ពាន់លានដុល្លារ កើន ១៦,៩%, កម្ពុជា-កូរ៉េខាងត្បូង ៥៩៩,៧៣ លានដុល្លារ កើន ៣៦,៨%, កម្ពុជា-អូស្រា្តលី ៤៣៥ លានដុល្លារ កើន ៥១%,…

សមាគមជំរុញការអភិវឌ្ឍវប្បធម៌ និងសិល្បៈចិន ដែល​ជាស្ថាប័នជាតិមួយរបស់ចិន មានតួនាទីសំខាន់ជំរុញការអភិវឌ្ឍវប្បធម៌ សិល្បៈ ការផ្លាស់ប្តូរវប្បធម៌អន្តរជាតិ និងការលើកកម្ពស់កិច្ចសហប្រតិបត្តិការរវាងប្រទេសចិន និងបណ្តាប្រទេសជាដៃគូ នៅ​ជុំវិញពិភពលោក​ បាន​ប្តេជ្ញា​​សហការជាមួយក្រសួងទេសចរណ៍​កម្ពុជា ដើម្បី​ជំរុញការផ្លាស់ប្តូរវប្បធម៌ និងការផ្សព្វផ្សាយទេសចរណ៍រួមគ្នា កម្ពុជា-ចិន។ ចំណែក​ក្រុមហ៊ុនធានារ៉ាប់រងធំជាងគេនៅចិន Ping An ក៏​បាន​​ឯកភាព​ជំរុញ និង​ពង្រឹង​កិច្ច​សហប្រតិបត្តិការ​ទេសចរណ៍​រួម​គ្នា​នេះ​ដែរ។ លោក Yang Xiaoyang ប្រធានសមាគមជំរុញការអភិវឌ្ឍវប្បធម៌ និងសិល្បៈចិន បាន​បង្ហាញ​ការ​ប្តេជ្ញា​បែបនេះ នៅពេល​លោកជួប​ពិភាក្សា​​ការងារ​​ជាមួយ​លោក​​​រដ្ឋមន្រ្តីក្រសួងទេសចរណ៍ ហួត ហាក់ ដែល​បាន​​អមដំណើរ​លោកនាយក​រដ្ឋមន្រ្តី ហ៊ុន ម៉ាណែត ទៅ​​បំពេញ​ទស្សនកិច្ចការងារនៅរដ្ឋធានីប៉េកាំង និងចូលរួមកម្មវិធី 2026 World AI Conference and High-Level Meeting on Global AI Governance ចាប់ពីថ្ងៃទី១៥-១៧ ខែកក្កដា ឆ្នាំ២០២៦ នៅទីក្រុងសៀងហៃ សាធារណរដ្ឋប្រជាមានិតចិន។ នៅក្នុងជំនួបការងារ​ប្រកបដោយផ្លែផ្កានេះ លោក ហួត ហាក់ បាន​ប្រាប់​លោក Yang Xiaoyang និងសហការី ពីសក្តានុពល និងបច្ចុប្បន្នភាពនៃវិស័យទេសចរណ៍កម្ពុជា, ​កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការលុបបំបាត់ទាំងស្រុងនូវបញ្ហា Online Scam និងពីគោលនយោបាយលើកលែងទិដ្ឋាការសម្រាប់ប្រជាពលរដ្ឋចិន ព្រម​ទាំង​បាន​លើក​ឡើង​អំពីចំណង​មិត្តភាព​ជា​ប្រវត្តិ​សាស្រ្ត និង​ជា​ប្រពៃណី​ដ៏​រឹងមាំ​រវាង​កម្ពុជា និងចិន ពិសេសការ​កសាងសហគមន៍​វាសនា​រួម​កម្ពុជា-ចិន គ្រប់រដូវកាល​ក្នុងយុគសម័យថ្មី។ ជាលទ្ធផល ភាគីទាំង២ បានឯកភាព «ជំរុញ និង​ពង្រឹង​កិច្ច​សហប្រតិបត្តិការ​រួមគ្នា​លើ​​វិស័យ​​​វប្បធម៌ និង​ទេសចរណ៍» តាមរយៈ​ការ​រៀបចំ​ព្រឹត្តិការណ៍​តាំង​ពិព័រណ៍​សិល្បៈ​ទៅ​វិញ​ទៅ​មក កិច្ច​សហការ​ក្នុង​ការ​ការពារ​បេតិកភណ្ឌវប្បធម៌ ការ​ជំរុញ​សិល្បៈ​ភាព​យន្ត វីដេអូ និង​ការ​ច្នៃ​ប្រឌិត​វប្បធម៌​ឌីជីថល ការ​អប់​រំសិល្បៈ និង​ការ​បណ្តុះ​បណ្តាល​ធនធាន​មនុស្ស ព្រម​ទាំង​ការ​អភិវឌ្ឍ​រួម​បញ្ចូល​គ្នារវាង​វប្បធម៌ និង​ទេសចរណ៍។ ទន្ទឹមនឹងនេះ សមាគម នឹង​រៀបចំ​សំណើ​គម្រោង​លម្អិត​ជូន​ក្រសួងទេសចរណ៍ និង​ដឹក​នាំ​គណៈប្រតិភូ​ធ្វើ​ទស្សនកិច្ច​នៅ​កម្ពុជា ដើម្បី​សិក្សា​ពី​លទ្ធភាព​ពង្រីក​កិច្ច​សហប្រតិបត្តិការ និង​ជំរុញ​ការផ្លាស់​ប្តូរ​សកម្មភាព​វប្បធម៌ និង​ទេសចរណ៍​រវាង​ប្រទេស​ទាំងពីរ ហើយ​ដើម្បី​អនុវត្ត​ឱ្យ​មាន​ប្រសិទ្ធ​ភាព និង​ប្រសិទ្ធផល​នៃ​ផែនការ​សកម្មភាព​ខា​ងលើ ភាគីទាំងពីរ បានធ្វើការចាត់​តាំង​មន្រ្តី​បង្គោលទៅវិញ​ទៅមក ដើម្បី​រៀបចំ​ការងារ​លម្អិត និង​ពិភាក្សា​បន្ថែម​លើ​គម្រោង​សហប្រតិបត្តិកា​រនា​ពេលខាងមុខ។ ដោយឡែក ក្រុមហ៊ុនធានារ៉ាប់រងធំជាងគេនៅប្រទេសចិន Ping An…

ខេត្ដសៀមរាប: សម្លៀកបំពាក់បែប «បុរាណខ្មែរ» ដែលកែច្នៃខុសពីទម្រង់ដើម និងមិនគោរពក្បួនខ្នាតវប្បធម៌ខ្មែរ នឹងមិនត្រូវបានអនុញ្ញាតឱ្យចូលទស្សនាតំបន់អង្គរទៀតឡើយ ខណៈអ្នកជំនាញរកឃើញថា ឈុតបុរាណដែលអាជីវករជួលឱ្យភ្ញៀវទេសចរនៅមុខប្រាសាទអង្គរវត្តប្រមាណ ៧០ភាគរយ ត្រូវបានស្លៀកពាក់ប្រាសចាកពីទម្រង់ដើម។ វិធានការរបស់អាជ្ញាធរជាតិអប្សរា ដែលចាប់អនុវត្តពីថ្ងៃទី១៣ ខែកក្កដា ឆ្នាំ២០២៦ បង្ហាញពីការរឹតបន្តឹងលើការបង្ហាញអត្តសញ្ញាណវប្បធម៌ខ្មែរនៅតំបន់បេតិកភណ្ឌអង្គរ បន្ទាប់ពីឈុតបុរាណកែច្នៃមួយចំនួនបានរងការរិះគន់ជាបន្តបន្ទាប់ថា ខុសពីក្បួនខ្នាតសម្លៀកបំពាក់ខ្មែរបុរាណ និងមានការប្រើប្រាស់កំណាត់ និងគ្រឿងអលង្ការនាំចូលពីប្រទេសថៃ។ការរឹតបន្តឹងនេះ ត្រូវបានប្រកាសក្រោយមន្ត្រីអាជ្ញាធរជាតិអប្សរា សហការជាមួយមន្ទីរវប្បធម៌ និងវិចិត្រសិល្បៈខេត្តសៀមរាប អាជ្ញាធរដែនដី និងប៉ូលិសការពារបេតិកភណ្ឌ បានជួបជាមួយក្រុមអាជីវករបម្រើសេវាជួលសម្លៀកបំពាក់បែបខ្មែរបុរាណដល់ភ្ញៀវទេសចរ កាលពីថ្ងៃទី១៣ ខែកក្កដា។ លោក ចាន់ សោភ័ន មន្ត្រីការិយាល័យសូនរូប នៃមន្ទីរវប្បធម៌ និងវិចិត្រសិល្បៈខេត្តសៀមរាប និងជាអ្នកស្រាវជ្រាវផ្នែកសម្លៀកបំពាក់ខ្មែរបុរាណ បានឱ្យដឹងថា ការជួលឈុតបុរាណនៅមុខប្រាសាទអង្គរវត្តបច្ចុប្បន្ន មានការស្លៀកពាក់ខុសពីទម្រង់ដើមប្រមាណ ៧០ភាគរយ។បញ្ហាដែលអ្នកជំនាញកត់សម្គាល់ជាពិសេស គឺការប្រើប្រាស់កំណាត់ និងគ្រឿងអលង្ការនាំចូលពីប្រទេសថៃ ដែលលោក ចាន់ សោភ័ន ចាត់ទុកថា ជាការប្រាសចាកពីអត្តសញ្ញាណ និងវប្បធម៌ខ្មែរ ហើយអាចប្រែក្លាយការបង្ហាញឈុតបុរាណនៅមុខប្រាសាទអង្គរវត្តទៅជាការបម្រើឱ្យវប្បធម៌បរទេស។ លោកបានបញ្ជាក់ថា ការស្លៀកពាក់តាមបែបបុរាណខ្មែរ មិនមែនគ្រាន់តែជាការជ្រើសរើសឈុតដែលមានរូបរាងស្រដៀងសម្លៀកបំពាក់បុរាណនោះទេ ប៉ុន្តែត្រូវប្រើកំណាត់ និងគ្រឿងអលង្ការខ្មែរ ព្រមទាំងគោរពតាមទម្រង់ និងក្បួនខ្នាតនៃការស្លៀកពាក់។ការតុបតែងខ្លួនរបស់ខ្មែរបុរាណ មានទម្រង់ខុសៗគ្នាទៅតាមឋានៈសង្គម ចាប់ពីព្រះមហាក្សត្រ ម្ចាស់ក្សត្រី អ្នកមានឋានៈខ្ពស់ រហូតដល់ប្រជារាស្ត្រសាមញ្ញ។ តាមការពន្យល់របស់លោក ចាន់ សោភ័ន សម្លៀកបំពាក់ហូលដែលធ្វើពីសូត្រ ត្រូវបានប្រើសម្រាប់ព្រះមហាក្សត្រ និងម្ចាស់ក្សត្រី ខណៈកំណាត់ល្បើក និងល្បើកជ័រជើង ត្រូវបានប្រើសម្រាប់អ្នកមានឋានៈជាសេដ្ឋី ឬគហបតី។ ចំណែកកំណាត់ត្បាញពីកប្បាស ត្រូវបានប្រើសម្រាប់ប្រជារាស្ត្រសាមញ្ញ។ ការយកកំណាត់ គ្រឿងអលង្ការ និងរចនាបថពីប្រភពផ្សេងៗមកលាយបញ្ចូលគ្នា ដោយមិនគោរពឋានៈ និងទម្រង់ប្រវត្តិសាស្ត្រ អាចធ្វើឱ្យឈុតដែលត្រូវបានហៅថា «បុរាណខ្មែរ» បាត់បង់ភាពត្រឹមត្រូវនៃអត្តសញ្ញាណដើម។ លោក ចាន់ សោភ័ន បានលើកទឹកចិត្តឱ្យអាជីវករជួលសម្លៀកបំពាក់កែប្រែការប្រើប្រាស់សម្ភារៈជាបណ្ដើរៗ ដោយងាកមកប្រើហូល សូត្រ ល្បើកពេជ្រ ល្បើករងជើង និងគ្រឿងអលង្ការខ្មែរ។លោកថា ការផ្លាស់ប្ដូរនេះ មិនត្រឹមតែជួយថែរក្សាទម្រង់សម្លៀកបំពាក់ប្រពៃណីបុរាណប៉ុណ្ណោះទេ ប៉ុន្តែក៏អាចលើកតម្លៃដល់អ្នកតម្បាញ និងជាងទងខ្មែរ ដែលជាអ្នកបន្តជំនាញសិប្បកម្មប្រពៃណីពីមួយជំនាន់ទៅមួយជំនាន់។ លោក ទេស សុធីរ អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា បានថ្លែងថា…

កំពង់ធំៈ បន្ទាប់ពីប្រជាពលរដ្ឋជាង ១០០នាក់នាំគ្នាតវ៉ាសុំសិទ្ធិកាន់កាប់ដី អាជ្ញាធរបានបញ្ជាក់ជូនថា ដីតំបន់នោះ គឺស្ថិតក្នុងតំបន់អភិរក្សព្រៃលិចទឹកបឹងទន្លេសាប និងជាតំបន់អភិរក្សសត្វខ្សឹប ហើយប្រជាពលរដ្ឋក៏ធ្លាប់ទទួលបានការកាត់ឆ្វៀលដីរួចមកហើយដែរ។ អភិបាលខេត្តកំពង់ធំ លោក នួន ផារ័ត្ន បានឱ្យដឹងថា ថ្មីៗនេះ ប្រជាពលរដ្ឋបាននាំគ្នាតវ៉ានៅភូមិសាស្ត្រទួលតាមុំ ឃុំស្រឡៅ ស្រុកតាំងគោក ដែលបញ្ហានេះ មិនមែនរដ្ឋបាលខេត្តមិនបានគិតគូរនោះទេ។ ជាក់ស្តែង លោកបានចុះទៅពិនិត្យដល់ទីតាំងនេះជាច្រើនលើកច្រើនសារផងដែរ។ លោកបញ្ជាក់ថា៖«ហើយនៅថ្ងៃនេះ ខ្ញុំបានចុះមកម្តងទៀត ដើម្បីជួបជាមួយបងប្អូន។ អ្វីដែលបងប្អូនទាមទារ គឺដីពីមុនរបស់បងប្អូនស្ថិតក្នុងតំបន់ ៣ ត្រូវបានកាត់ឆ្វៀលនៅឆ្នាំ២០២៣ មិនបានឆ្លើយតបទៅនឹងទំហំដែលបងប្អូនទាមទារទាំងស្រុង ហើយករណីនេះត្រូវបានសម្រេចដោយគណៈកម្មាធិការសុរិយោដីថ្នាក់ជាតិរួចមកហើយនាពេលថ្មីៗនេះ ដោយរក្សាដីទាមទារនោះក្នុងតំបន់ ៣ ដដែល»។ លោកបានបន្តថា ទោះបីជាយ៉ាងណា លោកបានសង្កេតឃើញថា ប្រជាពលរដ្ឋក៏មិនមែនគ្មានដីនោះដែរ។ ហេតុនេះ អាជ្ញាធរបានសម្រង់ត្រួសៗនូវឈ្មោះប្រជាពលរដ្ឋដែលតវ៉ា ចំនួនដីដែលពួកគាត់មាន និងដីដែលពួកគាត់តវ៉ាទាមទារបន្ថែម។ លទ្ធផលនៃការសម្រង់ត្រួសៗនោះបង្ហាញថា ផ្ទៃដីដែលបានកាត់ឆ្វៀលជូនពួកគាត់រួចហើយមានជាង ៥៨១ហិកតា និងដីដែលពួកគាត់តវ៉ាទាមទារបន្ថែមមានជាង ១៧៧ហិកតា។ ទន្ទឹមនេះ ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) ក៏បានឱ្យដឹងដែរថា ករណីសំណើរបស់ប្រជាពលរដ្ឋចំនួន ១០នាក់ តំណាងប្រជាពលរដ្ឋ ចំនួន ១៥៥គ្រួសារ ស្នើសុំចុះបញ្ជីចេញបណ្ណកម្មសិទ្ធិដីមួយកន្លែង ទំហំ ៣២២,៣២ហិកតា ស្ថិតក្នុងតំបន់ ៣មុំ ដែលស្ថិតនៅភូមិគោកត្របែក ឃុំស្រឡៅ និងភូមិឈូក ឃុំទ្រៀល ស្រុកតាំងគោក ខេត្តកំពង់ធំ ក្រុមការងារ អន្តរក្រ​សួង រដ្ឋបាលខេត្តកំពង់ធំ និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ធំ បានចុះពិនិត្យ វាស់វែង និងបានតម្លើងផែនទីទីតាំងដីស្នើសុំនេះ។ ជាលទ្ធផល ឃើញថា ទីតាំងដីស្នើសុំ មានទំហំសរុប ៣២២,៣២ហិកតា ស្ថិតក្នុងតំបន់អាងទឹក ៣មុំ ក្នុងនោះ ផ្ទៃដីទំហំ ១៤០,២៧ហិកតា ស្ថិតនៅ ផ្នែកខាងលិចនៃអាងទឹក និងផ្ទៃដីទំហំ ១៨១,៩៦ហិកតា ស្ថិតនៅផ្នែកខាងកើតនៃអាងទឹក មានទីតាំងស្ថិតនៅ ភូមិគោកត្របែក ឃុំស្រឡៅ និងភូមិឈូក ឃុំទ្រៀល ស្រុកតាំងគោក ខេត្តកំពង់ធំ…

ភ្នំពេញៈ ក្រុមការងារជំណាញនៃក្រសួងបរិស្ថានបានបញ្ជាឱ្យ ក្រុមហ៊ុន ហ្វាង ស៊ីង ហ្គាម៉ិន ឯ.ក FANG XING GARMENT CO., LTD. មានទីតាំងស្ថិតនៅភូមិឫស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញអនុវត្តតាមច្បាប់ជាធរមានឱ្យបានត្រឹមត្រូវ បន្ទាប់ពីបានរកឃើញមានការដុតកម្ទេចក្រណាត់ និងបញ្ចេញផ្សែងលើកម្រិតស្តង់ដាគុណភាពខ្យល់សាធារណៈ។ ក្រសួងបរិស្ថានបានឱ្យដឹងថា ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ដែលដឹកនាំដោយលោក ជោ ថុល អនុប្រ​ធាននាយកដ្ឋាន សហការ ជាមួយមន្ទីរបរិស្ថានរាជធានីភ្នំពេញ និងអាជ្ញាធរមូលដ្ឋាន បានរកឃើញថា ក្រុមហ៊ុនហ្វាង ស៊ីង ហ្គាម៉ិន ឯ.ក (FANG XING GARMENT) បានប្រើប្រាស់កម្ទេចក្រណាត់ដុតក្នុងឡចំហាយ ដោយពុំមានបំពាក់ប្រព័ន្ធចម្រោះសម្រាប់សម្អាតផ្សែងនៅថ្ងៃទី១៤ ខែកក្កដា ឆ្នាំ២០២៦។ ក្រុមការងារបានធ្វើការត្រួតពិនិត្យគុណភាពខ្យល់ ចេញពីបំពង់ផ្សែងឡចំហាយ ហើយហជាបឋមបានរកឃើញមានកម្រិតលើសកម្រិតស្ដង់ដា។ ជាមួយគ្នានេះ ក្រុមហ៊ុន ពុំមានកិច្ចសន្យាការពារបរិស្ថាន និងលិខិតអនុញ្ញាតបញ្ចេញសំណល់ពាក់ព័ន្ធនោះទេ។ ក្រសួងបរិស្ថាន បានចាត់វិធានការច្បាប់ចំពោះក្រុមហ៊ុន ដោយតម្រូវឱ្យក្រុមហ៊ុន ត្រូវបញ្ឈប់ការដុតកម្ទេចក្រណាត់ ក្នុងឡចំហាយជាបន្ទាន់ និងធ្វើការបំពាក់ប្រព័ន្ធសម្អាតផ្សែងចេញពីឡចំហាយ ឱ្យបានត្រឹមត្រូវ ព្រមទាំងបញ្ចេញផ្សែង អនុលោមតាមស្ដង់ដាកំណត់ ស្តីពីការគ្រប់គ្រងគុណភាពខ្យល់។ ជាមួយគ្ននេះ ក្រុមហ៊ុន ត្រូវរៀបចំកិច្ចសន្យាការពារបរិស្ថាន ហើយដាក់ជូនក្រសួងបរិស្ថាន ដើម្បីធ្វើការពិនិត្យ និងផ្ដល់យោបល់ ក៏ដូចជាត្រូវស្នើសុំលិខិតអនុញ្ញាតបញ្ចេញសំណល់ពាក់ព័ន្ធពីក្រសួងបរិស្ថាន។ លើសពីនេះ ក្រុមហ៊ុន ក៏ត្រូវទទួលរងពិន័យអន្ដរការណ៍ យោងតាមក្រមបរិស្ថាន និងធនធានធម្មជាតិ មាត្រា១៦១ មាត្រា១៧៣ និងមាត្រា៦៦៨ និងអនុក្រឹត្យលេខ៤២ ស្ដីពីការត្រួតពិនិត្យការបំពុលខ្យល់ និងត្រូវផ្ដល់សំណងផលប៉ះពាល់សុខភាពសាធារណៈ និងការខូចខាតបរិស្ថានតាមការវាយតម្លៃជាក់ស្ដែងពីមន្រ្តីជំនាញ៕