ប្រធានសហព័ន្ធកីឡាប្រដាល់គុនខ្មែរ និងជាអគ្គលេខាធិការសហព័ន្ធគុនខ្មែរអន្តរជាតិ លោក ខូវ ឆាយ បានបញ្ជាក់ពីរបត់នៃការរីកចម្រើនរបស់វិស័យប្រដាល់គុនខ្មែរ ដែលបានចាប់ផ្តើមតាំងពីមិនទាន់មានអ្នកស្គាល់ រហូតក្លាយជាប្រភេទកីឡាមួយ ដែលទទួលបានការគាំទ្រខ្លាំង នៅលើពិភពលោក ហើយក៏កំពុងបោះជំហានទៅមុខកាន់តែលឿន ដើម្បីឈានទៅរកការដាក់ «គុនខ្មែរ» ឱ្យមានការទទួលស្គាល់នៅអូឡាំពិកអន្តរជាតិ។
លោក ខូវ ឆាយ បានអះអាងថា សកម្មភាពគាំទ្រ «គុនខ្មែរ» នៅពេលនេះ ប្រៀបដូចជាព្យុះ ដែលកំពុងបក់បោកខ្លាំង នាំយកកីឡាអត្តសញ្ញាណគុនខ្មែរ ទៅដល់គ្រប់ទិសដៅ ធ្វើឱ្យពិភពលោក មានការចាប់អារម្មណ៍ និងចង់មករួមរស់ជីវភាពជាមួយគុនខ្មែរ ហើយនេះជាការផ្លាស់ប្តូរនូវរបត់ថ្មី ដោយប្រែពីការចេញទៅស្វែងរកការគាំទ្រនៅក្រៅប្រទេស មកជាពិភពលោក ងាកមករកគាំទ្រដល់គុនខ្មែរវិញ។
«មកដល់ម៉ោងនេះ ព្យុះនៃការគាំទ្រ ធ្វើឱ្យយើងដូចទឹកបាក់ទំនប់ ដោយមានការគាំទ្រ និងចូលរួមជាមួយយើងគ្រប់ប្រទេស។ មួយថ្ងៃៗមានការទំនាក់ទំនងចង់មករួមរស់ជីវភាពជាមួយគុនខ្មែរយើង គឺដូចខ្ញុំថាអ៊ីចឹង ឥឡូវនេះ មិនមែនគុនខ្មែរចេញទៅរកពិភពលោកនោះទេ គឺពិភពលោក កំពុងមករកគុនខ្មែរ»។
លោក ខូវ ឆាយ បានបន្ថែមថា៖ «ដល់ម៉ោងយើងសម្រិតសម្រាំងវិញម្តង ព្រោះជួនកាលប្រទេសមួយ មានស្ថាប័ន៥ទៅ៦ មករកចូលរួមជាមួយគុនខ្មែរ អ៊ីចឹងយើងត្រូវពិនិត្យមើល ថាតើស្ថាប័នមួយណា ដែលយើងធ្វើការជាមួយបាន ហើយទុកចិត្ត និងជឿជាក់ថា គាត់អភិវឌ្ឍគុនខ្មែរយើងឱ្យមានស្ថិរភាព និងនិរន្តរភាពនៅក្នុងប្រទេសរបស់ពួកគាត់»។
លោក ឆាយ លើកឡើងបែបនេះ ក្នុងសន្និសីទកាសែត ស្តីពីព្រឹត្តិការណ៍ប្រកួតការពារ និងដណ្តើមខ្សែក្រវាត់ CAMBODIA KUN KHMER BEST OF BEST IN AUSTRALIA នៅអគារ Chip Mong Tower កាលពីថ្ងៃទី ៩ ខែកក្កដា ហើយនេះជាបេសសកម្មថ្មីមួយទៀតនៃផែនការយុទ្ធសាស្ត្រផ្សព្វផ្សាយគុនខ្មែរ របស់សហព័ន្ធកីឡាប្រដាល់គុនខ្មែរ និងសហព័ន្ធគុនខ្មែរអន្តរជាតិ ទៅកាន់ទីក្រុងស៊ីដនី ប្រទេសអូស្ត្រាលី។
ព្រឹត្តិការណ៍ប្រកួតនេះ នឹងរៀបចំនៅថ្ងៃសុក្រ ទី១៧ ខែកក្កដា ឆ្នាំ២០២៦ ក្រោមកិច្ចសហការរវាងភាគីកម្ពុជា និងម្ចាស់ផ្ទះអូស្រ្តាលី ហើយកម្ពុជា បានត្រៀមបញ្ជូលកីឡាករ៥នាក់ និងកីឡាការិនី១នាក់ ទៅប្រកួតកាពារ និងដណ្តើមខ្សែក្រវាត់នៅទីនោះ។ ចំណែកលោក អ៊ឹង វីរៈ អគ្គនាយកបន្តវេននៃក្រុមហ៊ុនខ្មែរប៊ែវើរីជីស ដែលជាអ្នកឧបត្ថម្ភធំ បានអះអាងថា ការឧបត្ថម្ភនេះ ជាការបើកផ្លូវផ្សព្វផ្សាយគុនខ្មែរ ទៅកាន់ពិភពលោក។
លោក វីរៈ បញ្ជាក់ថា៖ «ការឧបត្ថម្ភគាំទ្រដល់ព្រឹត្តិការណ៍ប្រកួតនីមួយៗ គឺជាផ្នែកមួយនៃការប្តេជ្ញាចិត្តរយៈពេលវែងរបស់ក្រុមហ៊ុនយើង ក្នុងការបន្តឈរជាមួយវិស័យគុនខ្មែរ ដើម្បីរៀបចំឱ្យមានការប្រកួតប្រដាល់ទាំងក្នុងស្រុក និងក្រៅស្រុក ផ្តល់ឱកាសឱ្យកីឡាករ កីឡាការិនី បានបង្ហាញសមត្ថភាព ទទួលបានបទពិសោធន៍ និងផ្សព្វផ្សាយវប្បធម៌ជាតិ អត្តសញ្ញាណគុនខ្មែរទៅកាន់ពិភពលោក»។
ជាមួយគ្នានេះ លោក ខូវ ឆាយ បានអះអាងថា រចនាសម្ព័ន្ធគ្រប់គ្រង ដឹកនាំ ក្នុងការអភិរក្ស និងអភិវឌ្ឍ «គុនខ្មែរ» កំពុងដើរនៅលើផ្លូវដ៏ត្រឹមត្រូវមួយ ហើយកន្លងមកនេះ សហព័ន្ធ បានសហការជាមួយដៃគូផ្សេងៗ ដើម្បីរៀបចំឱ្យមានការប្រកួតប្រដាល់គុនខ្មែរ នៅតាមប្រទេសផ្សេងៗ ធ្វើឱ្យបរទេស មានការចាប់អារម្មណ៍កាន់តែខ្លាំង និងចង់ចូលរួមជាមួយគុនខ្មែរ។
ជាក់ស្តែងការរៀបចំប្រកួតប្រដាល់គុនខ្មែរ នៅប្រទេសបារាំង កាលពីពេលថ្មីៗនេះ លោក ខូវ ឆាយ បានបញ្ជាក់ថា ទទួលបានការគាំទ្រភ្លូកទឹកភ្លូកដី ហើយក្លិបជាច្រើននៅប្រទេសបារាំង បានប្តូរមកហ្វឹកហាត់គុនខ្មែរវិញ ចំណែកប្រទេសជាច្រើនទៀត ក៏បានចូលរួមជាមួយគុនខ្មែរផងដែរ ធ្វើឱ្យចំនួនសមាជិកភាពរបស់សហព័ន្ធគុនខ្មែរអន្តរជាតិ នៅក្រៅប្រទេស បានកើនឡើងកាន់តែច្រើន ហើយនេះជាការបើកជើងមេឃ ក្នុងការឈានទៅដាក់ «គុនខ្មែរ» ឱ្យមានការទទួលស្គាល់ នៅអូឡាំពិកអន្តរជាតិ។
លោក ខូវ ឆាយ បានថ្លែងថា៖«គុនខ្មែររបស់យើង បាននឹងកំពុងដើរនៅលើផ្លូវដ៏ត្រឹមត្រូវមួយ ក្នុងការផ្សព្វផ្សាយ ធ្វើឱ្យពិភពលោកភ្ញាក់ខ្លួន ទទួលយកគុនខ្មែរយើង ហើយតាមល្បឿននៃការអភិវឌ្ឍ និងស្ថានភាព ដែលយើងកំពុងដើរលើផ្លូវត្រូវនេះ ខ្ញុំជឿជាក់ថា ក្នុងរយៈពេលខាងមុខដ៏ខ្លី គុនខ្មែររបស់យើង នឹងមានការទទួលស្គាល់យ៉ាងទូលំទូលាយជាសកលលោកតែម្តង»។
ជាមួយផែនការនេះ លោក ឆាយ បញ្ជាក់ថា៖ «យើងនឹងរៀបចំបង្កើតរចនាសម្ព័ន្ធគ្រប់គ្រងដឹកនាំសហព័ន្ធគុនខ្មែរ នៅក្រៅប្រទេស ដោយនៅពេលនេះយើងមានសមាជិកភាពប្រមាណ ៦០ប្រទេសហើយ។ យើងរំពឹងថា គុនខ្មែរ នឹងក្លាយជាប្រភេទកីឡា ទទួលស្គាល់ដោយអូឡាំពិកអន្តរជាតិ ដែលនឹងដាក់ឱ្យប្រកួតក្នុងកម្រិតអូឡាំពិក មានជាង២០០ប្រទេស ហើយពេលនោះគុនខ្មែរ នឹងក្លាយជាកីឡារបស់សកលលោក ដែលមានការទទួលស្គាល់ពីគ្រប់ប្រទេស! នេះជាគោលបំណងធំ ដែលយើងចង់បាន»៕
