ក្រុមអ្នកជំនាញវិស័យឡូជីស្ទីកនៅកម្ពុជា យល់ឃើញថា ប្រសិនបើរដ្ឋាភិបាលអាចប្រែក្លាយអតីតព្រលានយន្តហោះអន្តរជាតិភ្នំពេញដែលទុកចោលនាពេលនេះឱ្យក្លាយទៅជាមជ្ឈមណ្ឌលភស្ដុភារកម្មប្រចាំតំបន់ គឺវានឹងផ្តល់ផលវិជ្ជមានច្រើនសម្រាប់ជំរុញកំណើនសេដ្ឋកិច្ចជាតិ។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ ៧ ចាប់ពីរង្វង់មូលស្គន់-ដល់រង្វង់មូលស្ពានគីហ្សូណា ខេត្តកំពង់ចាម នាព្រឹកថ្ងៃទី៧ ខែកក្កដា នេះ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា រាជរដ្ឋាភិបាលមានផែនការមេជាច្រើនលើគម្រោងវិនិយោគវិស័យហេដ្ឋារចនាសម្ព័ន្ធ និងឡូជីស្ទីក។ វិស័យនេះគឺជាផ្នែកដ៏សំខាន់ក្នុងការជំរុញសម្ទុះកំណើនសេដ្ឋកិច្ចជាតិ។ លោកបន្តថា នៅពេលនេះរដ្ឋាភិបាលកំពុងសិក្សាពីលទ្ធភាពនៃការរៀបចំអាកាសយានដ្ឋានអន្ដរជាតិភ្នំពេញឱ្យទៅជាមជ្ឈមណ្ឌលភស្ដុភារកម្មប្រចាំតំបន់ ដែលជាផ្នែកដ៏សំខាន់ក្នុងការតភ្ជាប់ចរាចរណ៍ទំនិញទៅកំពង់ផែអន្តរជាតិខេត្តព្រះសីហនុ។
លោកបានថ្លែងថា៖«ព្រលានយន្តហោះនៅភ្នំពេញ យើងកំពុងតែទាក់ទងរៀបចំធ្វើយ៉ាងណាដើម្បីបង្កើតជាមជ្ឈមណ្ឌលភស្ដុភារកម្មតំបន់ ប្រសិនបើអាចធ្វើទៅបាន។ ចំណែកកំពង់ផែសមុទ្រខេត្តព្រះសីហនុ យើងកំពុងកសាងប្លង់មេ(Master Plan) ដើម្បីឱ្យទៅជាមជ្ឈមណ្ឌលភស្ដុភារកម្មតំបន់។ អ៊ីចឹងទៅថ្ងៃក្រោយ តំបន់នេះគឺជាហេដ្ឋារចនាសម្ព័ន្ធទ្រង់ទ្រាយធំមានបំពាក់គ្រឿងកម្រិតខ្ពស់ ដើម្បីធានាភាពប្រកួតប្រជែង»។
លោក ម៉ាណែត បញ្ជាក់ទៀតថា ការអភិវឌ្ឍ និងរៀបចំប្លង់មេសម្រាប់ហេដ្ឋារចនាសម្ព័ន្ធដឹកជញ្ជូន គឺពិតជាមានសារៈសំខាន់ណាស់ក្នុងការចូលរួមចំណែកគាំទ្រកំណើនសេដ្ឋកិច្ចជាតិ និងជីវភាពរស់នៅរបស់ប្រជាជន ព្រោះផ្លូវបង្កើតក្តីសង្ឃឹម បង្កើតសកម្មភាពសេដ្ឋកិច្ច និងបង្កើតនូវសរសៃឈាមទៅចិញ្ចឹមនៅគ្រប់កន្លែងទាំងអស់។
អគ្គនាយកក្រុមហ៊ុន Linehaul Express (Cambodia) Co., Ltd និងជាអនុប្រធានសមាគមភស្តុភារកម្មកម្ពុជា លោក ស៊ិន ចន្ធី បានប្រាប់ភ្នំពេញប៉ុស្តិ៍ក្នុងថ្ងៃទី៧ ខែកក្កដា ថា គោលនយោបាយរបស់រាជរដ្ឋាភិបាលក្នុងការកាត់បន្ថយថ្លៃដើមដឹកជញ្ជូន និងឡូជីស្ទីក គឺពិតជាសំខាន់ក្នុងការគាំទ្រដល់ការជំរុញកំណើនសេដ្ឋកិច្ចជាតិ។ ផែនការប្រែក្លាយព្រលានយន្តហោះចាស់ដែលនៅទំនេរឱ្យទៅជាមជ្ឈមណ្ឌភស្ដុភារកម្មតំបន់ គឺជាការល្អ ព្រោះទីតាំងនេះជាចំណុចប្រសព្វនៃផ្លូវជាតិសំខាន់ៗពីបណ្តាខេត្តនានា ទៅកាន់កំពង់ផែសមុទ្រទឹកជ្រៅខេត្តព្រះសីហនុ។
លោកបានអះអាងថា៖«នេះជាផែនការមេដ៏ល្អសម្រាប់វិស័យដឹកជញ្ជូន និងឡីជីស្ទីក។ ខ្ញុំមានជំនឿថា ការងារនេះ(ការសិក្សារៀបចំព្រលានយន្តហោះអន្ដរជាតិភ្នំពេញឱ្យទៅជាមជ្ឈមណ្ឌលភស្ដុភារកម្មប្រចាំតំបន់) នឹងផ្តល់ផលចំណេញ និងភាពងាយស្រួលច្រើនដល់អ្នកវិនិយោគ ក៏ដូចជាអ្នកនៅក្នុងវិស័យដឹកជញ្ជូនតាមរយៈការធ្វើឱ្យតម្លៃដឹកជញ្ជូនទាបជាងមុន និងឆាប់រហ័សផងដែរ»។ លោកបន្តថា៖«ក្នុងនាមជាអ្នកនៅក្នុងវិស័យដឹកជញ្ជូន គឺខ្ញុំពិតជារីករាយដែលម្រមុខរាជរដ្ឋាភិបាលយកចិត្តទុកដាក់ខ្លាំងទៅលើវិស័យដឹកជញ្ជូន និងភស្តុភាកម្ម»។
បន្ថែមពីលើនេះ ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា លោក ជា ចាន់ដារ៉ា និយាយថា ការកសាងមជ្ឈមណ្ឌលភស្ដុភារកម្មដ៏ធំនៅក្នុងរាជធានីភ្នំពេញ គឺពិតជានឹងនាំមកនូវផលចំណេញច្រើនសម្រាប់សេដ្ឋកិច្ចជាតិ ព្រោះហេដ្ឋារចនាសម្ព័ន្ធដឹកជញ្ជូនទៅកាន់ទីនោះ គឺមានរួចជាស្រេច និងល្អប្រសើរផងដែរ។ ការអភិវឌ្ឍមជ្ឈមណ្ឌលភស្ដុភារកម្មកម្រិតតំបន់ ក៏នឹងក្លាយជាចំណែកក្នុងការទាក់ទាញវិនិយោគិនអន្តរជាតិឱ្យចូលមកបណ្តាក់ទុននៅកម្ពុជាកាន់តែច្រើនផងដែរ។
លោកនិយាយថា៖«ផែនការរបស់រាជរដ្ឋាភិបាលពិតជាល្អ ព្រោះទីនោះនៅចំកណ្តាលរាជធានីភ្នំពេញដែលអាចមានសេវាកម្មចម្រុះគាំទ្រជាច្រើន»។
បើតាមលោកនាយករដ្ឋមន្ត្រី ក្រៅពីផែនការអភិវឌ្ឍន៍ខាងលើ រាជរដ្ឋាភិបាលកម្ពុជាក៏មានផែនការមេជាច្រើនទៀត ជាពិសេសេផែនការមេ ស្តីពី«ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣» ដោយរាជរដ្ឋាភិបាលនឹងអភិវឌ្ឍមូលដ្ឋានឡូជីស្ទីកសំខាន់ៗចំនួន ១១ ទីតាំងរួមមាន៖ ១.មជ្ឈមណ្ឌលឡូជីស្ទីកភ្នំពេញ, ២.មជ្ឈមណ្ឌលឡូជីស្ទីកព្រះសីហនុ, ៣.សួនឡូជីស្ទីកបាវិត, ៤.សួនឡូជីស្ទីកប៉ោយប៉ែត, ៥.មណ្ឌលឡូជីស្ទីកសៀមរាប, ៦.មណ្ឌលឡូជីស្ទីកកំពត, ៧.មណ្ឌលឡូជីស្ទីកកំពង់ចាម, ៨.មណ្ឌលឡូជីស្ទីកបាត់ដំបង, ៩.មណ្ឌលឡូជីស្ទីកពោធិ៍សាត់, ១០.មណ្ឌលឡូជីស្ទីកបន្ទាយមានជ័យ, និង ១១.មណ្ឌលឡូជីស្ទីកកំពង់ធំ៕
