នាយករដ្ឋមន្ត្រីឥណ្ឌា លោក ណារិនដ្រា ម៉ូឌី កំពុងតែបំពេញដំណើរទស្សនកិច្ចផ្លូវការ ចំនួន ៣ថ្ងៃ ក្នុងប្រទេសឥណ្ឌូណេស៊ី។ ភាគីឥណ្ឌាសម្រេចថា នឹងផ្គត់ផ្គង់ឲ្យឥណ្ឌូណេស៊ី នូវប្រព័ន្ធមីស៊ីល BrahMos ដែលអាចបាញ់បានរយៈចម្ងាយឆ្ងាយ និងហោះលឿនជាងសំឡេង។ នេះបើតាមការប្រកាសរបស់អ្នកនាំពាក្យក្រសួងការបរទេសឥណ្ឌា លោក Randhir Jaiswal ក្នុងបណ្តាញសង្គមX ដោយបញ្ជាក់ នៅថ្ងៃ៧កក្កដា ថា ការសម្រេចទិញ-លក់មីស៊ីលរយៈឆ្ងាយនេះ ឋិតក្នុងក្របខណ្ឌរឹតចំណងសហប្រតិបត្តិការវិស័យការពារជាតិ។
ក្នុងពេលភ្លាមៗ ក្រសួងការពារជាតិឥណ្ឌូណេស៊ី ពុំបានផ្តល់ព័ត៌មានលម្អិតនោះទេ ជុំវិញការបញ្ជាទិញប្រព័ន្ធមីស៊ីលឥណ្ឌា បើទោះបីអ្នកកាសែតនៃទីភ្នាក់ងារព័ត៌មានបារាំង AFP បានទទួចសុំការបំភ្លឺយ៉ាងណាក្តី។ តែទីភ្នាក់ងារព័ត៌មាន Reuters បានសម្ភាសប្រភពស្និទ្ធ មកបញ្ជាក់ថា ការទិញលក់ប្រព័ន្ធមីស៊ីលនេះ មានទំហំទឹកប្រាក់ ប្រមាណ ៦៣០ លានដុល្លារ។ ក្នុងតំបន់អាស៊ាន ឥណ្ឌាធ្លាប់លក់ប្រព័ន្ធមីស៊ីល BrahMos ឲ្យប្រទេសហ្វីលីពីន និងវៀតណាម។
ក្រៅពីសំណុំរឿងមីស៊ីលរយៈឆ្ងាយនេះ រដ្ឋាភិបាលទីក្រុងញូវដែលីនិងហ្សាការតា បានសម្រេចចុះកិច្ចព្រមព្រៀងសហការគ្នាបន្ថែមទៀតទៅលើវិស័យជាច្រើន។ ពីទីក្រុងហ្សាការតា នាយករដ្ឋមន្ត្រីឥណ្ឌា លោក ណារិនដ្រា ម៉ូឌី ប្រាប់អ្នកកាសែត ថា ប្រទេសទាំង២ពង្រឹងកិច្ចសហការវិស័យការពារជាតិ បច្ចេកវិទ្យា សន្តិសុខផ្ទៃក្នុង និងសន្តិសុខដែនសមុទ្រ។ ក្នុងសន្និសីទសារព័ត៌មាន មេដឹកនាំឥណ្ឌា ក៏មិនភ្លេចថ្លែងកោតសរសើរអំពីទំនុកទុកចិត្តគ្នាខ្លាំង ដែលចេះតែកើនឡើងជាលំដាប់ ក្នុងវិស័យរសើបខ្លាំង ដូចជាផ្នែកសន្តិសុខ។ ជាក់ស្តែង ឆ្មាំសមុទ្រទាំង២ប្រទេស នឹងចូលរួមធ្វើសមយុទ្ធនិងយាមល្បាត នៅក្នុងដែនសមុទ្រឥណ្ឌា។ បើតាមលោក ម៉ូឌី ក្រុមហ៊ុននៃប្រទេសទាំង២ ក៏នឹងផ្តើមសហការគ្នាក្នុងវិស័យឧស្សាហកម្មនីស្សារណកម្ម គឺចម្រាញ់យករ៉ែដីកម្រ និងរ៉ែដែក។
ពីចំណែកខ្លួន ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប្រ៊ីយ៉ាតូ បានសង្កត់ធ្ងន់ថា សហប្រតិបត្តិការសេដ្ឋកិច្ច ជាសសរស្តម្ភនៃទំនាក់ទំនងរវាងញូវដែលីនិងហ្សាការតា។ លើសពីនេះ ប្រមុខរដ្ឋឥណ្ឌូណេស៊ី និងនាយករដ្ឋមន្ត្រីឥណ្ឌា បានឯកភាពគ្នាបង្កើនទំហំដោះដូរពាណិជ្ជកម្មទ្វេភាគី ហើយពន្លឿនការចរចាលើកិច្ចព្រមព្រៀងអនុគ្រោះពន្ធគយចំពោះទំនិញមួយចំនួន ថែមទៀត។
បន្ទាប់ពីបំពេញទស្សនកិច្ចនៅឥណ្ឌូណេស៊ី មេដឹកនាំឥណ្ឌា លោក ណារិនដ្រា ម៉ូឌី នឹងត្រូវបន្តដំណើរទៅកាន់ប្រទេស អូស្ត្រាលី និងនូវែលសេឡង់៕
