ថ្ងៃពុធទី៨កក្កដា លោក Robert Brovdi មេបញ្ជាការកម្លាំងដ្រូនអ៊ុយក្រែន បានបង្ហោះសារលើបណ្ដាញតេឡាក្រាមថា អ៊ុយក្រែនបានបញ្ជាដ្រូន បើកប្រតិបត្តិការកម្ទេចនាវាដឹកប្រេងរបស់រុស្ស៊ី នៅក្នុងសមុទ្រអាហ្សូវ AZOV បានចំនួន៩គ្រឿង។ ហើយក្នុងរយៈពេល៧២ម៉ោងចុងក្រោយ គឺអ៊ុយក្រែនបានវាយកម្ទេដនាវាដឹកប្រេងរុស្ស៊ី សរុបបាន១៩គ្រឿង។
នាវាដឹកប្រេងរបស់រុស្ស៊ីទាំងនេះ គឺជាមធ្យោបាយដែលរុស្ស៊ីដឹកជញ្ជូនប្រេងទៅផ្គត់ផ្គង់តំបន់គ្រីម៉េ។ កម្មវត្ថុនៃការវាយប្រហាររបស់អ៊ុយក្រែន គឺកាត់ផ្តាច់តំបន់គ្រីម៉េពីដៃរុស្ស៊ី តាមរយៈការកាត់ផ្តាច់បណ្តាញដឹកជញ្ជូនប្រភពថាមពល ទាំងតាមផ្លូវគោកនិងតាមផ្លូវទឹក។
គួរកត់សំគាល់ថា ប៉ុន្មានសប្តាហ៍មកនេះ អ៊ុយក្រែនបានបើកប្រតិបត្តិការដោយយានដ្រូន សំរុកវាយប្រហារខ្លាំង ទៅលើបណ្តាញហេដ្ឋារចនាសម្ព័ន្ធថាមពលរបស់រុស្ស៊ី។ នៅតំបន់គ្រីម៉េ ដែលរុស្ស៊ីបានឈ្លានពានគ្រប់គ្រងនៅឆ្នាំ២០១៤ អាជ្ញាធរបានប្រកាសអាសន្ន ដោយសារតែគ្មានប្រេងឥន្ធនៈ។
ក្រៅពីតំបន់គ្រីម៉េ និងតំបន់ក្បែរព្រំដែន អ៊ុយក្រែនបានបញ្ជាដ្រូនវាយប្រហារចំ ស្ថានីយចម្រាញ់ប្រេង និងទីតាំងស្តុកប្រេងធំៗរបស់រុស្ស៊ីជាច្រើនទីតាំង នៅឆ្ងាយៗ ជាក់ស្តែងនៅតំបន់ក្បែរទីក្រុងសាំងប៉េតេសបួរ បង្កឲ្យប្រជាជនរុស្ស៊ីភ័យចលាចល តម្រង់ជួរដណ្តើមគ្នាចាក់សាំងរថយន្ត។ ក្រុមហ៊ុន Gazprom របស់រុស្ស៊ី បានឲ្យដឹងទៀតថានៅថ្ងៃពុធទី៨កក្កដា ដ្រូនរបស់អ៊ុយក្រែន បានវាយប្រហារចំស្ថានីយបូមឧស្ម័នរុស្ស៊ី នៅតំបន់ Krasnodarskaya ដែលជាចំណុចបង្ហូរឧស្ម័នឆ្ពោះទៅកាន់តួកគី។ យប់ថ្ងៃអង្គារ ឈានចូលថ្ងៃពុធ ក្រសួងការពារជាតិរុស្ស៊ី ប្រកាសថាបានស្ទាក់កំទេចបានដ្រូនអ៊ុយក្រែន ចំនួន ៤១៥គ្រឿង ដែលបានហោះចូលជ្រៅក្នុងទឹកដីរុស្ស៊ី។
ប្រភពពីអ្នកវិភាគខ្លះ បានលើកឡើងថា ភាពជោគជ័យនៃប្រតិបត្តិការវាយប្រហារដោយដ្រូនរបស់អ៊ុយក្រែន នៅក្នុងទឹកដីរុស្ស៊ី បានបញ្ជាក់អំពីសមត្ថភាពកាន់តែឈានមុខ និងទំនើបខ្លាំងឡើងនៃបច្ចេកវិទ្យាដ្រូនរបស់អ៊ុយក្រែន ដែលអាចហោះបានឆ្ងាយ។ ទន្ទឹមគ្នានេះ វាបញ្ជាក់ដែរថា ប្រព័ន្ធការពារផ្លូវអាកាសរបស់រុស្ស៊ី ត្រូវខូចខាតអស់ច្រើន ឬក៏វិវឌ្ឍតាមមិនទាន់នឹងបច្ចេកវិទ្យាទំនើបរបស់ដ្រូនអ៊ុយក្រែន។ ជាងនេះទៀត ប្រភពព័ត៌មានខ្លះអះអាងថា អ៊ុយក្រែនបានបញ្ជូនកម្លាំងច្រើននាក់ ចូលឆ្ងាយក្នុងទឹកដីរុស្ស៊ី ដើម្បីបញ្ជាដ្រូនវាយប្រហារទៅលើគោលដៅធំៗមួយចំនួន ដែលជាទីតាំងយោធា និងរចនាសម្ព័ន្ធថាមពលរបស់រុស្ស៊ី។ ផ្ទុយទៅវិញ ការវាប្រហាររបស់រុស្ស៊ីមកលើអ៊ុយក្រែន គឺភាគច្រើនលើសលុប ធ្វើទៅលើអគារផ្ទះសំបែងប្រជាជនស៊ីវីល សាលារៀន មន្ទីរពេទ្យ និងទីតាំងសម្បត្តិបិតិកភណ្ឌជាដើម៕
