កូរ៉េខាងជើងនឹងបង្កើនសមត្ថភាពនុយក្លេអ៊ែរ ទាំងផ្នែកបរិមាណនិងគុណភាពឱ្យបានប្រសើរឡើង។ ជាងនេះទៅទៀត ក្នុងក្របខ័ណ្ឌនៃការធ្វើទំនើបកម្មវិស័យយោធា ព្យុងយ៉ាងនឹងពង្រីកសកម្មភាពចារកិច្ច។ នេះបើតាមសេចក្តីប្រកាសរបស់ទីភ្នាក់ងារសារព័ត៌មានផ្លូវការកូរ៉េខាងជើង KCNA។
សេចក្តីសម្រេច “បង្កើនសមត្ថភាពនុយក្លេអ៊ែរ និងចារកិច្ច” ជាវិធានការយោធាមួយដែលអនុម័តឡើង ក្នុងអង្គប្រជុំរបស់គណៈកម្មការយោធាមជ្ឈិមបក្ស នៅថ្ងៃព្រហស្បតិ៍ទី៩កក្កដា២០២៦។ នេះបើតាមសេចក្តីប្រកាសរបស់ទីភ្នាក់ងារសារព័ត៌មានផ្លូវការកូរ៉េខាងជើង នៅថ្ងៃសុក្រទី១០កក្កដា ដោយបានលម្អិតទៀតថា របបព្យុងយ៉ាង សម្រេចពង្រឹងកម្លាំងយោធានុយក្លេអ៊ែរ ទាំងបរិមាណនិងគុណភាព។ កូរ៉េខាងជើងនឹងប្រកាន់យកឆន្ទៈ បន្តផែនការបង្កើនសមត្ថភាពជំនាញ ព្រមទាំងធ្វើទំនើបកម្មមូលដ្ឋានទ័ព រចនាសម្ព័ន្ធបច្ចេកទេសនៃប្រព័ន្ធប្រយុទ្ធ និងពន្លឿនការសាងសង់មូលដ្ឋានទ័ពជើងទឹកដ៏ទំនើបបំផុតមួយ។
ជាងនេះទៅទៀត ប្រភពព័ត៌មានដដែលបានសង្កត់ធ្ងន់ថា ព្យុងយ៉ាងក៏ចង់ពង្រីកតួនាទីនិងបេសកកម្មរបស់ការិយាល័យស៊ើបអង្កេត និងចារកិច្ច ដែលជាភ្នាក់ងារចារកិច្ចយោធាទទួលបន្ទុកគ្រប់គ្រងប្រតិបត្តិការស៊ើបមើលកូរ៉េខាងត្បូង។
ជាអធិបតីក្នុងជំនួបប្រជុំ ប្រមុខដឹកនាំព្យុងយ៉ាងលោក គីម ជុងអ៊ុង បានប្រកាសថា ប្រទេសអាចធានាបាននូវសន្តិភាពនិងសន្តិសុខ ដរាបណាតែមានកងទ័ពខ្លាំង និងដែលអាចកម្ចាត់រាល់គ្រប់ទម្រង់នៃការគំរាមកំហែងបាន។
តាំងពីការចរចាជាមួយអាមេរិកត្រូវបរាជ័យនៅឆ្នាំ២០១៩មក កូរ៉េខាងជើង បានប្រកាសតាំងខ្លួនជាច្រើនលើកច្រើនសា ថាជា “រដ្ឋនុយក្លេអ៊ែរ ដោយគ្មានថ្ងៃកែប្រែ”។ ឯកាលើផ្នែកការទូត កូរ៉េខាងជើងបានងាកទៅស្និទ្ធជាមួយរុស្ស៊ី និងបានបង្ហោះផ្កាយរណបស៊ើបអង្កេត ដោយជោគជ័យនៅឆ្នាំ២០២៣។ ផ្កាយរណបយោធានោះ បើតាមការអួតអាងរបស់ព្យុងយ៉ាង អាចថតមូលដ្ឋានសំខាន់ៗរបស់យោធាអាមេរិកនិងកូរ៉េខាងត្បូងបានយ៉ាងច្រើន។
ក្រសួងបង្រួបបង្រួមរបស់កូរ៉េខាងត្បូង កំពុងតាមដានយ៉ាងកៀកកិតជាពិសេស លើផែនការពង្រីកតួនាទីនិងបេសកកម្មចារកិច្ចរបស់កូរ៉េខាងជើង។ តាំងពីឆ្នាំ១៩៥៣មក កូរ៉េខាងជើងតែងបើកប្រតិបត្តិការចារកិច្ចលើកូរ៉េខាងត្បូង ក្នុងទម្រង់ជាការប្រមូលព័ត៌មានឬធ្វើឃាត និងបញ្ជូនភ្នាក់ងារសម្ងាត់មកចូលបន្លំ។ បើតាមអ្នកស្រាវជ្រាវនៅវិទ្យាស្ថានកូរ៉េដើម្បីការបង្រួបបង្រួមជាតិ នៅថ្ងៃនេះ តាមរយៈការប្រកាសពង្រឹងពង្រីកសមត្ថភាពយោធានិងចារកិច្ច កូរ៉េខាងជើងបានបង្ហាញឆន្ទៈចាត់ទុកកូរ៉េទាំងពីរជារដ្ឋសត្រូវនឹងគ្នា ជាជាងឱ្យតម្លៃលើបទឈប់បាញ់ បិទបញ្ចប់សង្គ្រាមកាលពីជាង៥០ឆ្នាំមុន។ មកទល់ពេលនេះ កូរ៉េខាងទាំងពីរ នៅមានសង្គ្រាមនឹងគ្នានៅឡើយ ព្រោះមិនទាន់បានចុះកិច្ចព្រមព្រៀងសន្តិភាពជាមួយគ្នាទេ៕
