ថ្ងៃសោរ៍ទី១១កក្កដា ទីភ្នាក់ងារអវកាសជប៉ុន បានប្រកាសដំណឹងល្អមួយ ស្តីពីការសាកល្បងបានជោគជ័យ នូវយានគម្រូថ្មីមួយ ដែលអាចហោះឡើង ហើយហោះចុះមកវិញបាន ដើម្បីប្រើប្រាស់សាជាថ្មីទៀត។ ដំណើរឆ្ពោះទៅរកបច្ចេកវិទ្យានេះ ដែលបច្ចុប្បន្នមានតែយានរបស់ Space X មួយគត់ដែលអាចធ្វើបាន គឺនឹងអនុញ្ញាតឲ្យបេសកកម្មអវកាសជប៉ុន អាចសន្សំថវិកាបានច្រើន។
ទីភ្នាក់ងារអវកាសជប៉ុន បានប្រកាសដំណឹងល្អមួយ នៅថ្ងៃទី១១កក្កដា ស្តីពីការសាកល្បងបានជោគជ័យ នូវយានគម្រូមួយ ឬហៅថា ប្រូតូទីប ដែលអាចហោះឡើងហើយហោះចុះមកវិញបាន។ យានប្រភេទនេះ គឺជាយានដែលអាចប្រើបានច្រើនដង។ ទោះយ៉ាងណា នេះគឺត្រឹមតែជាដំណាក់កាលអភិវឌ្ឍន៍បឋមតែប៉ុណ្ណោះ។ ទីភ្នាក់ងារអវកាសជប៉ុន ត្រូវពិនិត្យវិភាគបន្ថែមទៀត។
ការសាកល្បង បានប្រព្រឹត្តទៅនៅស្ថានីយស្រាវជ្រាវអវកាសជប៉ុន Nishiro ដោយគេឃើញយាននេះ ហោះឡើងបានកំពស់ប្រមាណ១០ម៉ែត្រ មុននឹងបន្ទាបខ្លួនចុះមកវិញដោយសុវត្ថិភាព។ លោក Takashi Ito អ្នកទទួលបន្ទុកការសកល្បងនេះ បានលើកឡើងថា ក្រុមការងារបានចំណាយពេលវេលា និងការប្រឹងប្រែងខ្លាំងសម្បើមណាស់ ទំរាំអាចសម្រេចបានយានប្រូតូទីបនេះ។
គួររំលឹកដែរថា គិតត្រឹមពេលនេះ គឺមានតែយាន Falcon របស់ ក្រុមហ៊ុន Space X ទេ ដែលជាយានអាចហោះចុះមកវិញបានដោយសុវត្ថិភាព ហើយអាចត្រូវប្រើហោះច្រើនដងបាន។ ភាគច្រើនលើសលុបនៃយានទាំងអស់ដែលត្រូវគេបាញ់បង្ហោះទៅអវកាស មិនថាដឹកផ្កាយរណប ឬដឹកអ្នកអវកាស គឺសុទ្ធតែសឹងតែជាយានប្រើបានតែម្តងៗតែប៉ុណ្ណោះ។ ដើម្បីសាងសង់យាននីមួយៗ ហោះបានតែម្តង គេត្រូវចំណាយប្រាក់ច្រើនរយលានដុល្លារ។
សូមបញ្ជាក់ថា ការអភិវឌ្ឍន៍បច្ចេកវិទ្យាឈានទៅមានយានដែលអាចប្រើការបានច្រើនដង គឺជាយុទ្ធសាស្ត្រសន្សំសំចៃថវិកាផង ហើយក៏ជាការកាត់បន្ថយកាកសំណល់នៅលើ អាកាសផង។ កាលពីខែមិថុនា ក្រុមហ៊ុន Honda បានក្លាយជាក្រុមហ៊ុនឯកជនជប៉ុនទីមួយ ដែលបានបង្ហោះសាកល្បងបានជោគជ័យ នូវយានដែលបំពាក់ដោយបច្ចេកវិទ្យាអាចហោះចុះមកវិញបាន។
មិនមែនតែជប៉ុនទេ ដែលខំប្រឹងក្នុងវិស័យបច្ចេកវិទ្យានេះ ចិនក៏កំពុងស្ទុះឡើងណាស់ដែរ។ កាលពីថ្ងៃសុក្រ ទី១០កក្កដា បណ្តាញទូរទស្សន៍ចិន បានផ្សាយរូបភាពបង្ហាញឲ្យឃើញ យានឆាងចេងរបស់ចិន បានហោះបន្ទាបខ្លួនចុះមកវិញដោយជោគជ័យ នៅស្ថានីយទទួលមួយនៅក្នុងសមុទ្រ បន្ទាប់ពីបានហោះឡើងទៅលើនាំយកផ្កាយរណបទៅអវកាស។ នេះគឺជាការបោះជំហានជោគជ័យជាលើកទី១នៃវិស័យអវកាសចិន ក្នុងបច្ចេកវិទ្យាហោះចុះមកវិញតាមការបញ្ជា៕
