អតីតប្រមុខដឹកនាំកាតា ពីឆ្នាំ១៩៩៦-២០១៣ អេមៀ ស្ហេក ហាម៉ាដ បេន ខាលីហ្វា អាល់ថានី ដែលបានដឹកនាំរាជាណាចក្រតាកា ឱ្យក្លាយជាប្រទេសមានបាននិងលេចមុខលើឆាកអន្តរជាតិ បានស្លាប់ក្នុងជន្មាយុ៧៤ឆ្នាំ។ នេះបើតាមសេចក្តីប្រកាសរបស់រដ្ឋាភិបាលតាកានៅថ្ងៃអាទិត្យទី១២កក្កដា២០២៦។
ក្រោយផ្ទុះចលនាបដិវត្តឆ្នាំ១៩៩៥ ក្នុងរាជវាំង ដោយគ្មានការបង្ហូរឈាម ស្ហេក ហាម៉ាដ បេន ខាលីហ្វា អាល់ថានី បានក្លាយជា(អេមៀ) ប្រមុខដឹកនាំរបស់កាតា បន្តពីឪពុក នៅឆ្នាំ១៩៩៦។ កាលណោះ កាតាដ៏តូច គ្មានអ្វីសោះ។ ប៉ុន្តែ ក្រោមការដឹកនាំរបស់ អេមៀ ហាម៉ាដ ខាលីហ្វា អាល់ថានី កាតាបានប្រែមុខមាត់ ក្លាយជាក្តារអុករបស់តំបន់និងអន្តរជាតិ។
ក្នុងរយៈពេលតែប៉ុន្មានឆ្នាំ ប្រមុខរដ្ឋកាតាបានស្ថាបនាមូលដ្ឋានអភិវឌ្ឍប្រទេសបានយ៉ាងលឿនស្លេវ ដើម្បីក្លាយជាប្រទេសផលិតឧស្ម័នរាវធម្មជាតិដ៏ធំជាងគេបំផុតមួយនៅលើពិភពលោក។ សមិទ្ធផលនេះជាផ្លែផ្កានៃគម្រោងបង្កើត អាជ្ញាធរជាតិវិនិយោគ ទទួលបន្ទុកធ្វើវិនិយោគ ក្នុងតម្លៃរាប់សិបពាន់លានដុល្លារ ជាពិសេសនៅបរទេស។
បង្កើតបណ្តាញផ្សព្វផ្សាយព័ត៌មានអន្តរជាតិ Al Jazeera នៅពេលឡើងកាន់អំណាចភ្លាមជាយុទ្ធសាស្ត្រដែលបានលើកស្ទួយឥទ្ធិពលរបស់ប្រទេស និងបាននាំកាតាឱ្យក្លាយជាតួអង្គដ៏សំខាន់នៃនយោបាយអារ៉ាប់ ក្នុងនាមជាអន្តរការី ជាម្ចាស់មូលនិធិ និងជាអ្នកការទូត។ គឺក្រោមអំណាចគ្រប់គ្រងរបស់អេមៀ ស្ហេក ហាម៉ាដ បេន ខាលីហ្វា អាលថានី នេះតែម្តង ដែលតាកាបានចាប់ផ្តើមផ្តល់ជំនួយឧបត្ថម្ភជាច្រើនរយលានដល់តំបន់ហ្កាហ្សា ដើម្បីសាងសង់ផ្លូវថ្នល់និងមន្ទីរពេទ្យ។
ក្នុងផ្ទៃប្រទេសវិញ ស្ហេកហាម៉ាដ បានធ្វើកំណែទម្រង់នយោបាយ និងរដ្ឋធម្មនុញ្ញ តាមរយៈប្រជាមតិនៅឆ្នាំ២០០៣ ដោយកំណត់បែងចែកអំណាចនីតិប្រតិបត្តិ អំណាចនីតិបញ្ញត្តិ និងអំណាចតុលាការ តែអំណាចនីតិប្រតិបត្តិត្រូវស្ថិតក្រោមគ្រប់គ្រងរបស់អេមៀ។ ខុសពីបណ្តាប្រមុខដឹកនាំនៅក្នុងតំបន់ដែលតែងកាន់អំណាចរហូតដល់ដង្ហើមចុងក្រោយ នៅឆ្នាំ២០១៣ អេមៀកាតា បានបង្កើតភាពភ្ញាក់ផ្អើល ប្រកាសដាក់រាជ ដោយផ្ទេរតំណែងទៅឱ្យកូនប្រុសទីបួន ស្ហេក តាមីម អាល់ថានី និងលែងសូវបញ្ចេញសំឡេង ឬមុខមាត់ជាសាធារណៈរហូតមក។
បានឯករាជ្យពីអាណានិគមអង់គ្លេស នៅឆ្នាំ១៩៧១ កាតាជារដ្ឋអារ៉ាប់ដ៏តូចជាងគេបំផុតមួយ មានប្រជាពលរដ្ឋសរុបជាង២លាននាក់កន្លះ និងស្ថិតក្រោមការដឹកនាំរបស់ត្រកូលអាល់ថានីតាំងពីពាក់កណ្តាលសតវត្សរ៍ទី ១៩មក៕
