ពិធីដង្ហែក្បួនព្យុហយាត្រាអបអរថ្ងៃបុណ្យជាតិ១៤កក្កដាឆ្នាំ២០២៦នេះ មានលក្ខណៈធំសម្បើម ជាប្រវត្តិសាស្ត្រ និងមិនដែលធ្លាប់មានធ្វើដូចពីមុនមកទេ៖ ជាសរុបមានយោធា ជាង៧ពាន់នាក់ មកពីគ្រប់កងពល ជើងគោក ជើងអាកាសនិងជើងទឹក … គួរឱ្យកត់សម្គាល់ជាងគេគឺវត្តមាន កងទ័ពអ៊ុយក្រែននិងសម្ព័ន្ធមិត្ត លើមហាវិថីដ៏ល្អជាងគេនៅលើពិភពលោក។ បារាំងប្រារព្ធពិធីបុណ្យជាតិដ៏ធំ ដោយលើកអ៊ុយក្រែន និងសម្ព័ន្ធមិត្តអឺរ៉ុប ជាប្រទេសកិត្តិយស។
ជាក្បួនព្យុហយាត្រាដ៏ធំសម្បើមជាប្រវត្តិសាស្ត្រដែលសរុបមានកងពលថ្មើរជើងជិត ៦ ៨០០នាក់ និងយន្តហោះ ៩៨គ្រឿង ឧទ្ធម្ភាគចក្រ ៣១គ្រឿង យានយន្ត ៣១៥គ្រឿង និងជាពិសេសកងពលនៃក្រុមប្រទេសជាសម្ព័ន្ធស្ម័គ្រចិត្តដើម្បីអ៊ុយក្រែនចំនួនជាង ៥០០នាក់ ព្រមទាំងកងពលអ៊ុយក្រែន ២៥នាក់ ដើរបង្អួតខ្លួនលើដងមហាវិថី Champs Elysées។ កងល្បាត និងយន្តហោះចម្បាំង ២គ្រឿងដែលមាន ពីឡុតអមសញ្ជាតិអ៊ុយក្រែនជាអ្នកបើកកម្មវិធីដង្ហែក្បួន។ យន្តហោះរបស់១០ប្រទេសអឺរ៉ុបក៏បានចូលរួមបង្អួតខ្លួនដែរ ព្រោះអ៊ុយក្រែន និងសម្ព័ន្ធមិត្ត គឺជាប្រទេសកិត្តិយសក្នុងពិធីបុណ្យជាតិបារាំងឆ្នាំ២០២៦នេះ។
នេះជាលើកទីមួយនៃប្រវត្តិបុណ្យជាតិបារាំងដែលមានយោធាចូលរួមបង្ហែក្បួនព្យុហយាត្រាក្នុងចំនួនដ៏ច្រើនបែបនេះ។ តែបារាំងចង់ឆ្លុះបញ្ចាំងឱ្យឃើញអំពីការបំពាក់អាវុធឡើងវិញរបស់បារាំង ចង់ឱ្យឃើញអំពីស្វ័យភាពយុទ្ធសាស្ត្ររបស់បារាំង និងការភ្ញាក់ខ្លួនរបស់អឺរ៉ុប។ នេះបើតាមការបញ្ជាក់របស់វិមានប្រធានាធិបតីបារាំង ដោយអះអាងទៀតថា ព្យុហយាត្រាថ្ងៃនេះក៏ជានិម្មិត្តរូបបញ្ជាក់ថា អឺរ៉ុបយល់ពីគ្រោះថ្នាក់របស់ពិភពលោក និងបានសម្រេចក្តាប់ស្ថានការណ៍ក្នុងដៃនៅចំពោះមុខការគំរាមកំហែងសន្តិសុខរបស់រុស្ស៊ី និងប្រធានាធិបតីអាមេរិក លោក ដូណាល់ ត្រាំដែលពិបាកស្មាន។
សូមរំឭកជូនថា នៅពេលជាប់ឆ្នោតឡើងជាប្រធានាធិបតីភ្លាម លោកម៉ាក្រុងបានអញ្ជើញលោកដូណាល់ត្រាំជាភ្ញៀវកិត្តិយសក្នុងថ្ងៃបុណ្យជាតិបារាំង ឆ្នាំ២០១៧។ តែនៅថ្ងៃនេះ លោកម៉ាក្រុងបានធ្វើជាអធិបតីក្នុងពិធីបុណ្យជាតិជាលើកចុងក្រោយក្នុងនាមជាប្រធានាធិបតីនៅក្បែរប្រមុខរដ្ឋ និងប្រមុខរដ្ឋាភិបាលអឺរ៉ុបចំនួន ២៤ប្រទេស និងជាពិសេស គឺប្រធានាធិបតីអ៊ុយក្រែន លោក ហ្សេឡែនស្គី បន្ទាប់ពីបានរៀបចំកិច្ចប្រជុំកំពូលសម្ព័ន្ធក្រុមស្ម័គ្រចិត្តដើម្បីអ៊ុយក្រែនចំនួន ៣៧ប្រទេស និងអ៊ុយក្រែនក្នុងទីក្រុងប៉ារីសកាលពីថ្ងៃទី១៣ កក្កដា។ ផ្តួចផ្តើមឡើងដោយបារាំង និងអង់គ្លេស និងដែលមានសមាសភាពភាគច្រើនជាប្រទេសអឺរ៉ុប សម្ព័ន្ធក្រុមស្ម័គ្រចិត្តដើម្បីអ៊ុយក្រែនបានប្តេជ្ញាគាំទ្រអ៊ុយក្រែនតាមផ្លូវយោធា ព្រមទាំងអាចបញ្ជូនកងទ័ពទៅកាន់អ៊ុយក្រែនផងនៅពេលមានកិច្ចព្រមព្រៀងឈប់បាញ់ដើម្បីកំញើញរុស្ស៊ីកុំឱ្យវាយលុកជាថ្មី។
ជាងនេះទៅទៀត តាមរយៈពិធីបុណ្យជាតិដែលមានក្បួនព្យុហយាត្រាដ៏ធំសម្បើមគ្មានប្រៀបពេលនេះ លោកម៉ាក្រុងក៏ចង់ប្រាប់ពិភពលោកថា យោធាបារាំងមានឫទ្ធិអំណាចកាន់តែខ្លាំងឡើងជាលំដាប់ជាមួយនឹងការបង្កើនថវិកាយោធាទ្វេដង ក្រោមអាណត្តិរបស់លោក៕
