សហភាពអឺរ៉ុប បានចុះកិច្ចព្រមព្រៀងផលិតដ្រូនចម្បាំងរួមគ្នាជាមួយ អ៊ុយក្រែន។ តាំងពីសង្គ្រាមរុស្ស៊ីឈ្លានពានអ៊ុយក្រែន នៅដើមឆ្នាំ២០២២មក អ៊ុយក្រែនបានសម្រួចបច្ចេទេស រហូតក្លាយជាអ្នកជំនាញយ៉ាងប៉ិនប្រសប់ខាងផលិតដ្រូនចម្បាំង។ សហភាពអឺរ៉ុប ចង់យកជំនាញរបស់អ៊ុយក្រែននេះ ដើម្បីវិនិយោគជំរុញឧស្សាហកម្មយោធា ព្រមទាំង ជួយការពារសន្តិសុខរួម ផង។
អ៊ុយក្រែន បានសម្រួចជំនាញផលិតយានដ្រូនចម្បាំងយ៉ាងខ្លាំងក្លា ចាប់ពីប្រទេសនេះ រងគ្រោះព្រោះសង្គ្រាមឈ្លានពានពីសំណាក់រុស្ស៊ី ដែលផ្ទុះឡើងចាប់ពីខែកុម្ភៈ ឆ្នាំ២០២២។ បណ្តាប្រទេសអន្តរជាតិ បានកោតសរសើរ ដោយទទួលស្គាល់បទពិសោធដ៏សម្បូរបែបនិងចំណេះជំនាញយ៉ាងប៉ិនប្រសប់របស់វិស្វករនិងអ្នកបច្ចេកទេសអ៊ុយក្រែន ក្នុងការផលិតដ្រូនចម្បាំង ដើម្បីទប់ទល់ ហើយវាយបកទៅលើរុស្ស៊ី។ នេះបើតាម លោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុប ដោយបញ្ជាក់ថា កិច្ចព្រមព្រៀងផលិតដ្រូនចម្បាំងរួមគ្នា មានគោលបំណងជួយការពារអ៊ុយក្រែន ក៏ដូចជា ជួយការពារសុវត្ថិភាពសហភាពអឺរ៉ុប ដែរ។ ពោលគឺ ការបោះទុនវិនិយោគផលិតដ្រូនរួមគ្នានៅពេលនេះ ជាការវិនិយោគដើម្បីសន្តិសុខរួមគ្នា។
ពីរដ្ឋធានីកៀវ ថ្ងៃទី១៥កក្កដា លោកស្រីប្រធានគណៈកម្មការអឺរ៉ុប ក៏បានគូសបង្ហាញអំពីការផ្សារភ្ជាប់ចំណេះជំនាញនិងបទពិសោធលើសមរភូមិជាក់ស្តែងរបស់អ៊ុយក្រែន ទៅនឹងឧស្សាហកម្មផលិតអាវុធអឺរ៉ុប។
ទោះយ៉ាងណាក៏ដោយ សហភាពអឺរ៉ុប និង អ៊ុយក្រែន មិនបានលម្អិតថា ផែនការផលិតដ្រូនរួមគ្នានេះ មានចំនួនប៉ុន្មាន និងត្រូវផលិតនៅទីតាំងណាទេ។ តែ លោកស្រី អួរស៊ូឡា វ៉ុនឌែរ ឡេយែន អះអាងថា ភាគីទាំង ២ បានសម្រេចជ្រើសរើសមជ្ឈមណ្ឌលផលិតដ្រូន និងត្រៀមទីកន្លែងដែលមានសុវត្ថិភាព ដើម្បីធានាអាចផលិតដ្រូន ក្នុងចំនួនដ៏ច្រើន។ ចំណែក វិមានប្រធានាធិបតីអ៊ុយក្រែន បានផ្តល់ទិន្នន័យថា ក្នុងមួយឆ្នាំៗ អ៊ុយក្រែនអាចមានសមត្ថភាពផលិតដ្រូនចម្បាំង ចំនួនជាង ១០ លានគ្រឿង ដែលអាចបញ្ជាឲ្យហោះរយៈចម្ងាយឆ្ងាយៗ។ អ៊ុយក្រែន ក៏គ្រោងនឹងបង្កើនចំនួនផលិត ឲ្យច្រើនគុណទ្វេដង។
កន្លងទៅ រដ្ឋាភិបាលទីក្រុងកៀវ បានចុះកិច្ចព្រមព្រៀងផលិតដ្រូនចម្បាំង ជាមួយប្រទេសកាតា និងអារ៉ាប៊ីសាអ៊ូឌីត ក្រោយពីប្រទេសទាំង២នេះ ប្រឈមមុខវិបត្តិសង្គ្រាមអ៊ីរ៉ង់។ ដោយផ្អែកទៅលើភាពប៉ិនប្រសប់និងបទពិសោធច្រើនឆ្នាំក្នុងសង្គ្រាមទប់ទល់នឹងការឈ្លានពានពីសំណាក់រុស្ស៊ី រដ្ឋាភិបាលអ៊ុនក្រែនក៏កំពុងតែរៀបចំកិច្ចព្រមព្រៀងផលិតដ្រូនចម្បាំងបន្ថែមទៀត ជាមួយប្រទេសអាល្លឺម៉ង់ ហ្វាំងឡង់ និង កាណាដា ។ល។
ក្រៅពីប្រកាសកិច្ចព្រមព្រៀងសហការផលិតអាវុធ គណៈកម្មការអឺរ៉ុប ក៏បានសម្រេចពន្យារសុពលភាពទៅលើកិច្ចព្រមព្រៀងការពារជនភៀសខ្លួនអ៊ុយក្រែន រហូតដល់ឆ្នាំ២០២៨។ តែលើកលែងតែពួកប្រុសៗអ៊ុយក្រែន ចន្លោះពី ២៣ ទៅ ៦០ឆ្នាំ ដែលជាអាយុពេញកម្លាំងច្បាំង និងត្រូវជាប់កាតព្វកិច្ចយោធា។ នៅលើទឹកដីសហភាពអឺរ៉ុបបច្ចុប្បន្ន មានជនភៀសខ្លួនអ៊ុយក្រែន ប្រមាណជិត ៥ លាននាក់ ដែលភាគច្រើនកំពុងជ្រកកោននៅក្នុងប្រទេសអាល្លឺម៉ង់ ប៉ូឡូញ បារាំង និងសាធារណរដ្ឋឆែក ៕
