លោក ជុំ សុន្ទរី ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសជប៉ុន បានចាត់ទុកកម្មសិក្សាការី និងពលករជំនាញកម្ពុជាទាំងអស់នៅប្រទេសជប៉ុន «ជាស្ពានមិត្តភាពរវាងកម្ពុជា និងជប៉ុន» ហើយលោកបានលើកទឹកចិត្ត និងជំរុញឱ្យពួកគេ ខិតខំសិក្សារៀនសូត្រ និងអភិវឌ្ឍជំនាញវិជ្ជាជីវៈ ដើម្បីយកបទពិសោធន៍ និងចំណេះដឹងទៅចូលរួមអភិវឌ្ឍមាតុប្រទេសនាពេលអនាគត។
លោក ជុំ សុន្ទរី បានលើកឡើងបែបនេះ នៅពេលលោក ជួបសំណេះសំណាល
ជាមួយកម្មសិក្សាការី និងពលករជំនាញកម្ពុជាជាង១០០នាក់ នៅខេត្តស៊ីហ្ស៊ីអូកា ប្រទេសជប៉ុន កាលពីថ្ងៃទី១២ ខែកក្កដា ឆ្នាំ ២០២៦ ហើយកម្មវិធីនេះ ក៏មានការចូលរួមពីសមាជិកតំណាងរាស្រ្ត និងថ្នាក់ដឹកនាំមូលដ្ឋានរបស់ជប៉ុន ព្រមទាំងប្រធានក្រុមហ៊ុននៅប្រទេសជប៉ុនមួយចំនួនផងដែរ។
នៅក្នុងពិធីនោះ លោក ជុំ សុន្ទរី បានគូសបញ្ជាក់អំពីការរីកចម្រើនជាបន្តបន្ទាប់នៃទំនាក់ទំនងកម្ពុជា-ជប៉ុន ចាប់តាំងពីប្រទេសទាំង២ បានដំឡើងកម្រិតទំនាក់ទំនងទៅជា «ដៃគូយុទ្ធសាស្ត្រគ្រប់ជ្រុងជ្រោយ» នៅ ឆ្នាំ២០២៣។ លោកថា ជប៉ុននៅតែជាដៃគូដ៏សំខាន់មួយរបស់កម្ពុជា ជាពិសេស ក្នុងវិស័យអភិវឌ្ឍធនធានមនុស្ស ការផ្ទេរជំនាញ ការបង្កើតការងារ និងការអភិវឌ្ឍសេដ្ឋកិច្ច និងសង្គម។
ជាមួយគ្នានេះ លោកឯកអគ្គរាជទូត បានកោតសរសើរចំពោះកម្មសិក្សាការី និងពលករជំនាញកម្ពុជាទាំងអស់ ដែល «បានដើរតួនាទីជាស្ពានមិត្តភាពរវាងកម្ពុជា និងជប៉ុន» ហើយលោកបានលើកទឹកចិត្តពួកគេ ឱ្យខិតខំសិក្សារៀនសូត្រ និង អភិវឌ្ឍជំនាញវិជ្ជាជីវៈក្នុងអំឡុងពេលស្នាក់នៅប្រទេសជប៉ុន ដើម្បីយកបទពិសោធន៍ និងចំណេះដឹងទៅ ចូលរួមអភិវឌ្ឍមាតុប្រទេសនាពេលអនាគត។
យ៉ាងណាក៏ដោយ លោក ជុំ សុន្ទរី បានអំពាវនាវឱ្យកម្មសិក្សាការី និងពលករជំនាញកម្ពុជាទាំងអស់គោរពច្បាប់ និងបទប្បញ្ញត្តិរបស់ប្រទេសជប៉ុន ប្រកាន់ខ្ជាប់នូវអាកប្បកិរិយាល្អ ចៀសវាងរាល់សកម្មភាពខុសច្បាប់ និងយកចិត្តទុកដាក់ការពារខ្លួនពីគ្រោះមហន្តរាយធម្មជាតិ និងហានិភ័យសុខភាពផ្សេងៗ។
លោកបានបញ្ជាក់ថា៖ «ស្ថានឯកអគ្គរាជទូតកម្ពុជាប្រចាំប្រទេសជប៉ុន នឹងបន្តផ្តល់សេវា កុងស៊ុល កិច្ចគាំពារផ្នែកការងារ និងជំនួយចាំបាច់ផ្សេងៗជូនប្រជាពលរដ្ឋកម្ពុជានៅទូទាំងប្រទេសជប៉ុន»។ លោកក៏បានលើកទឹកចិត្តឱ្យសហគមន៍ខ្មែរនៅជប៉ុនបន្តរក្សាសាមគ្គីភាព ជួយគាំទ្រគ្នា ទៅវិញទៅមក និងចូលរួមយ៉ាងសកម្មក្នុងសកម្មភាពសហគមន៍ និងវប្បធម៌នានា ដើម្បីរួមចំណែកពង្រឹង ចំណងមិត្តភាព និងការយល់ដឹងទៅវិញទៅមករវាងប្រជាជននៃប្រទេសទាំង២។
ទន្ទឹមនឹងនេះ លោក ជុំ សុន្ទរី បានអរគុណដល់រាជរដ្ឋាភិបាល និងប្រជាជនជប៉ុន អាជ្ញាធរមូលដ្ឋាន ក្រុមហ៊ុនដៃគូ និងភាគីពាក់ព័ន្ធទាំងអស់ ដែលបានបន្តផ្តល់ការគាំទ្រ និងរួមចំណែកលើកកម្ពស់សុខុមាលភាពរបស់ប្រជាពលរដ្ឋកម្ពុជានៅប្រទេសជប៉ុន ហើយលោកបានបញ្ជាក់ពីការប្តេជ្ញាចិត្តរបស់ស្ថានឯកអគ្គរាជទូត «ក្នុងការបន្តសហការយ៉ាងជិតស្និទ្ធជាមួយដៃគូពាក់ព័ន្ធទាំងអស់ ដើម្បីពង្រឹង និងពង្រីកបន្ថែមទៀតនូវចំណងមិត្តភាពដ៏រឹងមាំ និងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងកម្ពុជា និងជប៉ុន»៕
