តើជំនួបកំពូលអូតង់លើកនេះ នៅទីក្រុងអង់ការ៉ា អាចនឹងចៀសបានទេ អំពីកំហឹងឆេវឆាវ ដ៏កំរោលរបស់លោកប្រធានាធិបតីសហរដ្ឋអាមេរិក ដូណាល់ ត្រាំ ? មន្ត្រីការទូតអឺរ៉ុប បានទទួលស្គាល់ថា កន្លងមកនៅរៀងរាល់លើកជំនួបកំពូល គឺគេត្រូវឆ្លងកាត់ការលំបាកច្រើនណាស់ ត្រូវប្រឹងប្រែងដោយប្រុងប្រយ័ត្នបំផុត ដើម្បីធ្វើយ៉ាងណាកុំឲ្យលោកដូណាល់ ត្រាំ ខឹងច្រលោត ក្នុងពេលប្រជុំជជែកគ្នា។
សូមរំលឹកថា សំណុំរឿងធំៗ២ដែលអាចធ្វើឲ្យលោកដូណាល់ ត្រាំ ដំឡើងសរសៃក ស្រែកស្តីបន្ទោសសមាជិកអូតង់ផ្សេងទៀត គឺទីមួយទាក់ទិននឹងការដំឡើងថវិកាចំណាយលើវិស័យការពារជាតិ និងទី២ ទាក់ទិននឹងរឿងដែលប្រទេសសមាជិកអូតង់ មិនទៅជួយរំដោះបើកផ្លូវច្រកសមុទ្រអកមូហ្ស ដែលរឿងនេះលោកត្រាំ នៅតែគុំគួនក្នុងចិត្ត។
យ៉ាងណាក៏ដោយ គេបានដាក់ក្តីសង្ឃឹមទៅលើលោក អ៊ែរដូហ្កាន់ ប្រធានាធិបតីតួកគី ដែលជាម្ចាស់ផ្ទះរៀបចំជំនួបកំពូលនេះ ថាអាចជួយនិយាយថ្នមចិត្តលោកដូណាល់ ត្រាំ ព្រោះលោកមានទំនាក់ទំនងល្អជាមួយ។ ដូចគ្នាដែរ លោកម៉ាក រូតត៍ អគ្គលេខាធិការអូតង់ ក៏ត្រូវសង្ឃឹមដែរថាអាចជួយទប់កំហឹងលោកដូណាល់ ត្រាំ តាមរយៈពាក្យសរសើរបញ្ជោដែលលោកត្រាំ ចូលចិត្ត។
ជាមួយគ្នានេះដែរ ក្រុមប្រទេសសមាជិកអូតង់ គ្រោងប្រកាសនូវកិច្ចសន្យាធំៗមួយចំនួន ដើម្បីទិញសព្វាវុធ នៅក្នុងឱកាសជំនួបកំពូលនេះ។ កាលពីជំនួបកំពូលឆ្នាំទៅម៉ិញ លោកដូណាល់ ត្រាំ បានទាមទារថាប្រទេសសមាជិកអូតង់ ត្រូវដំឡើងការចំណាយ ឲ្យបានយ៉ាងហោច ៥% នៃចំណូលដុលក្នុងស្រុក។ ការដំឡើងការចំណាយ ដែលលោកដូណាល់ ត្រាំ សង្ឃឹមថាប្រទេសសមាជិកអូតង់ នឹងចាយទៅលើការទិញគ្រឿងសព្វាវុធរបស់អាមេរិក។
គួរបញ្ជាក់ថា នៅព្រឹកថ្ងៃទី១នៃការបើកជំនួបកំពូលនេះ លោកម៉ាក រូតត៍បានប្រកាសគម្រោងកិច្ចសន្យាមួយចំនួន ដូចជាកិច្ចសន្យាទិញយន្តហោះ Airbus A330 MRTT ១គ្រឿងបន្ថែមទៀត សម្រាប់ដឹកជញ្ជូនច្រើនមុខ ទាំងសម្ភារៈ កងកម្លាំងនិងប្រេងសាំង ប្រើនៅក្នុងក្រុមប្រតិបត្តិការពហុជាតិរបស់អូតង់។ ដូច្នេះនៅខ្វះតែ១គ្រឿងទៀត គឺគ្រប់១២គ្រឿងទៅតាមកម្មវត្ថុហើយ។ ប្រទេសអឺរ៉ុបច្រើនប្រទេស បានប្រកាសផងដែរ ចូលរួមនៅក្នុងគម្រោង អភិវឌ្ឍន៍យន្តហោះ Airbus A440 សម្រាប់ដឹកជញ្ជូនកងទ័ព នៅក្នុងក្រុមប្រតិបត្តិការពហុជាតិអូតង់។
កិច្ចសន្យាដ៏ធំមួយទៀត គឺ រវាងអូតង់ និងក្រុមហ៊ុនSAAB របស់ស៊ុយអែត ដែលគ្រោងផលិតយន្តហោះបំពាក់ដោយប្រព័ន្ធរ៉ាដាស្រង់ទិន្នន័យដ៏ទំនើបបំផុតមួយ ឈ្មោះ ថា GlobalEye ។ ដោយឡែក កាណាដា បានប្រកាសសហការជាមួយ ក្រុមហ៊ុនអាល្លឺម៉ង់ Thyssenkrupp Marine Systems (TKMS) ដើម្បីសាងសង់នាវាមុជទឹកប្រភេទថ្មី ។
គួរបញ្ជាក់ដែរថា ជំនួបកំពូលអូតង់ លើកនេះ បានធ្វើឡើងក្នុងបរិបទដែលអ៊ុយក្រែន កំពុងតែមានសន្ទុះឌីណាមិក យ៉ាងវិជ្ជមាន នៅលើសមរភូមិជាមួយរុស្ស៊ី។ វិស័យឧស្សាហកម្មសព្វាវុធអ៊ុយក្រែន បានស្ទុះហក់ឡើងយ៉ាងខ្លាំង ជាពិសេសក្នុងវិស័យដ្រូន ដែលអឺរ៉ុបកំពុងតែត្រូវការ។ ក្រុមប្រទេសអឺរ៉ុបនិងកាណាដា បានសន្យាបន្តជួយអ៊ុយក្រែន ចំនួន៤០ពាន់អឺរ៉ូ ក្នុងឆ្នាំ២០២៦ និង២០២៧ខាងមុខ។ ចំណែកសហភាពអឺរ៉ុបវិញប្រកាសផ្តល់កម្ចី៣០ពាន់លានអឺរ៉ូ។ គេសង្ឃឹមថា សន្ទុះវិជ្ជមានទាំងអស់នេះ នឹងធ្វើឲ្យលោកដូណាល់ ត្រាំ ងាកមកជួយគាំទ្រអ៊ុយក្រែននិងសម្ព័ន្ធមិត្តអូតង់។ តែយ៉ាងណា ២ថ្ងៃមុនជំនួបកំពូលនេះ លោកពូទីនបានទូរស័ព្ទទៅនិយាយជាមួយលោកដូណាល់ ត្រាំ។ គេមិនដឹងថាលោកពូទីន ខ្សឹបខ្សៀវផ្លុំដាក់ត្រចៀកលោកដូណាល់ ត្រាំ ដូចម្តេចខ្លះទេ!
