អាមេរិក និងអ៊ីរ៉ង់វាយប្រហារគ្នា ដោយមិនអនុគ្រោះ លើកលែងឲ្យគ្នា សូម្បីតែថ្ងៃបុណ្យសពរបស់ប្រមុខសាសនាកំពូល អាលី ខាមេណី។ នៅថ្ងៃបញ្ចុះសពរបស់អាយ៉ាតូឡា អាលី ខាមេណី នៅថ្ងៃព្រហស្បតិ៍ទី ៩កក្កដា អាមេរិកនិងអ៊ីរ៉ង់បានវាយប្រហារសងសឹកគ្នាសាជាថ្មី នៅបន្ទាប់ពី កប៉ាល់ដឹកប្រេង៣គ្រឿងរងការវាយប្រហារនៅពេលឆ្លងកាត់ច្រកសមុទ្រអកមូហ្សនៅ សប្តាហ៍នេះ។ បើតាមក្រសួងសុខាភិបាលអ៊ីរ៉ង់ ការវាយប្រហារ២ថ្ងៃរបស់អាមេរិកបានសម្លាប់មនុស្សយ៉ាងហោច ១៧នាក់ និងរបួសជាង៩០នាក់។ កូវ៉ែត បារ៉ែន និងការតាដែលមានមូលដ្ឋានទ័ពរបស់អាមេរិក ក៏បានក្លាយជាផ្ទាំងស៊ីបវាយប្រហារសងសឹករបស់អ៊ីរ៉ង់វិញដែរ។
ពីការកាន់ទុក្ខ ទៅជាការចងកំហឹង។ ប្រជាជនអ៊ីរ៉ង់កាន់តែស្អប់ខឹង ប្រកាសសងសឹក ព្រោះថា អាមេរិកនៅតែចងពៀរ វាយប្រហារអ៊ីរ៉ង់ ដោយមិនលើកលែង សូម្បីថ្ងៃបុណ្យបញ្ចុះសពអាយ៉ាតូឡា អាលី ខាមេណី។
បើតាមក្រសួងសុខាភិបាលអ៊ីរ៉ង់ ការវាយប្រហារ២ថ្ងៃជាប់គ្នារបស់អាមេរិកបានសម្លាប់មនុស្សយ៉ាងហោច ១៧នាក់ និងរបួស៩៣នាក់។ ដោយវាយប្រហារលើទីតាំងហេដ្ឋារចនាសម្ព័ន្ធស៊ីវិល អ៊ីរ៉ង់បានចោទប្រកាន់អាមេរិកថា មានចេតនារំខាន បំផ្លាញពិធីបុណ្យបញ្ចុះសពអតីតប្រមុខដឹកនាំសាសនាអ៊ីរ៉ង់ អាលី ខាមេណី ដែលស្លាប់ក្នុងការវាយប្រហាររបស់អាមេរិក និងអ៊ីស្រាអែលកាលពីថ្ងៃទី២៨កុម្ភៈ។ ជាក់ស្តែង ស្ពាន២កន្លែង និងផ្លូវរថភ្លើង១ខ្សែដែលតភ្ជាប់ទៅ Machhad ភូមិកំណើត និងជាទីបញ្ចុះសពរបស់អាយ៉ាតូឡា អាលី ខាមេណី ក៏ត្រូវបំផ្លាញនៅក្នុងការវាយប្រហាររបស់អាមេរិក នៅថ្ងៃពុធ ឈានចូលដល់ថ្ងៃព្រហស្បតិ៍។
ទីបញ្ជាការដ្ឋានកងទ័ពអាមេរិកប្រចាំនៅតំបន់ដើមបូព៌ាវិញអះអាងថា ខ្លួនបានវាយប្រហារទៅលើទីតាំងយោធារបស់អ៊ីរ៉ង់ ចំនួន ៩០កន្លែង ដោយដៅជាពិសេសទៅលើប្រព័ន្ធការពារដែនអាកាស ទីតាំងរ៉ាដាតាមដានឆ្នេរ និងទីតាំងស្តុកមីស៊ីល ដ្រូនរបស់អ៊ីរ៉ង់។ កងទ័ពអាមេរិកបើកការវាយប្រហារទៅលើអ៊ីរ៉ង់សាជាថ្មី បន្ទាប់ពី លោកដូណាល់ ត្រាំបានប្រកាសលែងមានបទឈប់បាញ់ និងឈប់ចរចាជាមួយអ៊ីរ៉ង់ ព្រោះថា អ៊ីរ៉ង់មានល្បិចកលច្រើន និងបានវាយប្រហារសាជាថ្មី ទៅលើកប៉ាល់ដឹកប្រេង៣គ្រឿង នៅច្រកសមុទ្រអកមូហ្ស នៅដើមសប្តាហ៍នេះ។
ជាការឆ្លើយតប សងសឹកវិញ ឆ្មាំបដិវត្តន៍អ៊ីរ៉ង់បានបាញ់មីស៊ីល និងដ្រូនសំដៅប្រទេសជិតខាង ដូចជាបារ៉ែន ការតា កូវ៉ែត និងហ្សកដានី ជាទីដែលមានមូលដ្ឋានទ័ពសំខាន់ៗរបស់អាមេរិក។ ហ្សកដានី និងបារ៉ែន បាននិយាយថា គេបានបាញ់ស្ទាក់មីស៊ីល និងដ្រូនរបស់អ៊ីរ៉ង់។
ទោះប្រធានាធិបតីអាមេរិកអះអាងថា ការវាយប្រហារលើកនេះនឹងមិនបណ្តាលឲ្យផ្ទុះសង្រ្គាមប្រយុទ្ធគ្នាសាជាថ្មី ប៉ុន្តែ ការផ្ទុះអាវុធសងសឹកគ្នាទៅវិញ ទៅមក ជាសញ្ញាដែលបង្ហាញថា អាមេរិក និងអ៊ីរ៉ង់ នៅតែជាសត្រូវសួពូជ ដែលមិនអាចមានថ្ងៃ ចុះសម្រុងគ្នាបានឡើយ។
ម្យ៉ាង ការវាយប្រហារតបវិញភ្លាមភ្លែតរបស់ឆ្មាំបដិវត្តន៍អ៊ីរ៉ង់ដោយមិនចុះញ៉មអាមេរិកបានឆ្លុះបញ្ចាំងថា ជួរថ្នាក់ដឹកនាំអ៊ីរ៉ង់នៅតែបែកបាក់ ខ្វែងគំនិតគ្នា។ មួយក្រុមជាអ្នកចម្រើននិយម ដែលចង់ជានាជាមួយអាមេរិក ដើម្បីការដកទណ្ឌកម្មសេដ្ឋកិច្ចអន្តរជាតិ និងបើកចំហប្រទេសដើម្បីអភិវឌ្ឍសេដ្ឋកិច្ច។ ចំណែកមួយក្រុមទៀត ដែលជាក្រុមប្រកាន់តឹង ដូចជាក្រុមឆ្មាំបដិវត្តន៍អ៊ីរ៉ង់ជាដើម មិនចង់ឲ្យរដ្ឋាភិបាលចរចាជាមួយអាមេរិកឡើយ។ គេជឿថា គឺក្រុមនេះហើយដែលជាអ្នកសម្រេចឲ្យអ៊ីរ៉ង់បដិសេធ មិនព្រមឲ្យច្រកសមុទ្រអកមូហ្ស ត្រលប់ទៅរកស្ថានភាពដើមវិញ។ សង្រ្គាមវាយប្រហាររបស់អាមេរិក និងអ៊ីស្រាអែលលើកនេះ បានផ្តល់ឱកាសឲ្យអ៊ីរ៉ង់បានលេសចូលទៅគ្រប់គ្រងច្រកសមុទ្រ អកមូហ្ស និងបង្កព្យុះភ្លៀង តាមរយៈការកម្រិត ទារយកថ្លៃឆ្លងកាត់ពីកប៉ាល់ដែលចេញចូលតាមច្រកអកមូហ្ស។ អ៊ីរ៉ង់នឹងបានផលចំណេញច្រើន ព្រោះថា នៅមុនសង្រ្គាម ក្នុង១ថ្ងៃៗ ប្រេងឆៅប្រមាណ ២០លានធុងបារីល ស្មើនឹង២០%នៃតម្រូវការប្រេង ក្នុងពិភពលោកបានឆ្លងកាត់ច្រកសមុទ្រអកមូហ្ស៕
