កិច្ចប្រជុំកំពូលអូតង់ ២ថ្ងៃ នៅតួកគី បញ្ចប់ក្នុងបរិយាកាសល្អប្រសើរ។ ក្នុងរដ្ឋធានីអង់ការ៉ា ប្រធានាធិបតីអាមេរិក លោក ដូណាល់ ត្រាំ មិនសូវបញ្ចេញកំហឹងខឹងក្រោធ ច្រងេងច្រងាង និងមិនប្រើសម្តីធ្ងន់ៗទ្រគោះបោះបោក ដូចកាលពីជំនួបកំពូលប៉ុន្មានឆ្នាំកន្លងទៅនោះឡើយ។ សហរដ្ឋអាមេរិក របស់លោក ត្រាំ ក៏លែងគំរាមដើរចេញពីអូតង់ នោះដែរ។ នេះបើតាមអ្នកការទូតម្នាក់ ដែលបានចូលរួមកិច្ចប្រជុំបិទទ្វារ។
អគ្គលេខាធិការអង្គការអូតង់ លោក Mark Rutte ក៏បញ្ជាក់ថា សមាជិកទាំងអស់អះអាងអំពីភាពមិនរង្គោះរង្គើសោះឡើយ។ ក្រោយជំនួបកំពូល រដ្ឋសមាជិកទាំង៣២ប្រទេស សម្តែងស្មារតីរួបរួមគ្នា ស្របតាមមាត្រា ៥ នៃសន្ធិសញ្ញាអាត្លង់ទិកខាងជើង ដែលឈរនៅលើគោលការណ៍ជួយការពារគ្នាទៅវិញទៅមក ដោយពួតដៃគ្នាប្រយុទ្ធករណីមានការវាយប្រហារលើរដ្ឋសមាជិកណាមួយ។
ទោះយ៉ាងណាក្តី ក្នុងសន្និសីទសារព័ត៌មានដាច់ដោយឡែក ចៅហ្វាយសេតវិមាន បន្តលើកឡើងអំពីការទើសចិត្តខ្លះៗ ទាក់ទងនឹង អេស្ប៉ាញ កោះហ្ក្រូអិនឡង់ដ៍ និង អ៊ីរ៉ង់។ ក្នុងករណីអេស្ប៉ាញ ពុំមែនជារឿងថ្មីដែលលោក ត្រាំ បន្តរិះគន់អេស្ប៉ាញ ជុំវិញការចូលរួមវិភាគទានចូលកេសអូតង់។ មួយទៀត បញ្ហាកោះហ្ក្រូអិនឡង់ដ៍ ប្រធានាធិបតីអាមេរិករូបនេះ អះអាងថា ហ្ក្រូអិនឡង់ដ៍ មានសារៈសំខាន់ចាំបាច់ចំពោះអាមេរិក ច្រើនជាងចំពោះដាណឺម៉ាក។ មិនតែប៉ុណ្ណោះ លោក ត្រាំ បានឆ្លៀតរិះគន់រដ្ឋសមាជិកអូតង់ ដែលមិនជួយជ្រោមជ្រែងអាមេរិក ក្នុងសង្គ្រាមអ៊ីរ៉ង់។ ទោះបីជាមានការរិះគន់ខ្លះៗពីសំណាក់មេដឹកនាំអាមេរិកក្តី ក៏គេឃើញថាសមាជិកអូតង់ សម្តែងស្មារតីសាមគ្គីភាព និងអះអាងអំពីការរួបរួមជួយគ្នា។ ទន្ទឹមនឹងគ្នានេះ អធិការបតីអាល្លឺម៉ង់ លោក Friedrich Merz បានលើកសរសើរថា អូតង់បន្តរួបរួមជាធ្លុងមួយ និងកាន់តែខ្លាំងក្លា។
ជាក់ស្តែង សមាជិកអូតង់ សហភាពអឺរ៉ុប និងជាពិសេស កាដាណា បានមូលមតិឯកភាពផ្តល់ជំនួយថវិកាយោធាបន្ថែមឲ្យអ៊ុយក្រែន ហើយ សហរដ្ឋអាមេរិករបស់លោក ត្រាំ ក៏បានប្រកាសយល់ព្រមឲ្យអ៊ុយក្រែនផលិតប្រព័ន្ធខែលមីស៊ីល Patriot ដែលអាចបាញ់ស្ទាក់មីស៊ីលរុស្ស៊ី។
ភ្លាមៗ រុស្ស៊ី ចេញប្រតិកម្មតបថា ការពង្រឹងជំនួយយោធារបស់អូតង់ចំពោះអ៊ុយក្រែន ជាការមិនសមហេតុផល និង គ្មានទំនួលខុសត្រូវ។ បើតាមក្រសួងការបរទេសរុស្ស៊ី ការសម្រេចចិត្តរបស់អូតង់ បង្កឲ្យមានវិនាសកម្មធ្ងន់ធ្ងរ និងជំរុញឲ្យបំពាក់សព្វាវុធកាន់តែច្រើននៅទ្វីបអឺរ៉ុប។
តាមគម្រោង កិច្ចប្រជុំកំពូលអូតង់ឆ្នាំ២០២៧ គ្រោងនឹងរៀបចំនៅប្រទេសអាល់បានី៕
