បន្ទាប់ពីរងបាតុភូតក្តៅខ្លាំងហួសហេតុអស់ជាច្រើនថ្ងៃ បារាំងកំពុងជួបគ្រោះភ្លើងឆេះព្រៃដ៏កំណាចបំផុតមួយទៀត នៅក្បែរក្រុងប៉ារីស។ ក្រុមពន្លត់អគ្គិភ័យជិត៥០០នាក់ កំពុងប្រើគ្រប់មធ្យោបាយ តាមផ្លូវអាកាសផង ផ្លូវគោកផង ប្រយុទ្ធប្រឆាំងនឹងភ្លើងព្រៃ តាំងពីរសៀលថ្ងៃអាទិត្យម្សិលមិញមក។ នៅព្រឹកថ្ងៃចន្ទទី១៣កក្កដានេះ យន្តហោះពន្លត់អគ្គិភ័យកាណាឌែរ ពីរគ្រឿងកំពុងបន្តធ្វើប្រតិបត្តិការ ប្រដាក់គ្នា ជួយក្រុមឡានទឹក។
ភ្លើងឆេះព្រៃដ៏កំណាចមិនធ្លាប់មានបានលេបត្របាក់ព្រៃ Fontainebleau ដែលស្ថិតនៅចម្ងាយ ៦០គីឡូម៉ែត្រពីប៉ារីសអស់ប្រមាណ ៨០០ហិចតាក្នុងរយៈពេលតែប៉ុន្មានម៉ោង និងកំពុងបន្តឆាបឆេះយ៉ាងពេញទំហឹង។ អណ្តាតភ្លើង និងផ្សែងខ្មួលខ្មាញ់ពេញផ្ទៃមេឃដែលអាចមើលឃើញតាំងពីចម្ងាយប្រមាណជាង ២០គីឡូម៉ែត្រ។
ក្រុមពន្លត់អគ្គិភ័យជិត ៥ ០០នាក់ ឧទ្ធម្ភាគចក្រពន្លត់អគ្គិភ័យចំនួន ២គ្រឿង យន្តហោះតាមដានស្ថានភាពភ្លើងឆេះព្រៃមួយគ្រឿង យន្តហោះដឹកទឹក ដឹកសារជាតិបង្អាក់ភ្លើងដែលបញ្ជូនមកពីតំបន់ផ្សេងៗនៃប្រទេសកំពុងប្រញឹកធ្វើប្រតិបត្តិការឆ្លាស់គ្នា ប្រយុទ្ធប្រឆាំងនឹងភ្លើងព្រៃដ៏សម្បើម ដើម្បីសង្រ្គោះជីវិត និងព្រៃ។ នេះក៏ជាលើកទីមួយ ដែលបារាំងបានប្រើយន្តហោះពន្លត់អគ្គិភ័យកាណាឌែរដើម្បីពន្លត់ភ្លើងព្រៃនៅតំបន់ជុំវិញរដ្ឋធានីប៉ារីស។ ចរាចរណ៍តាមផ្លូវល្បឿនលឿន A6 ដែលជាផ្លូវដ៏សំខាន់សម្រាប់ចេញចូលរដ្ឋធានីតាមភាគខាងត្បូងត្រូវកាត់ផ្តាច់មួយផ្នែក។ បណ្តាញរថភ្លើងប៉ែកអាគ្នេយ៍ត្រូវរអាក់រអួលយ៉ាងខ្លាំង ដោយការឆេះខូចខាតបណ្តាញចរន្តអគ្គិសនី។ ក្រុមអ្នកពន្លត់អគ្គិភ័យរំពឹងថានឹងអាចគ្រប់គ្រងភ្លើងឆេះព្រៃ Fontainebleau នេះបាននៅក្នុងថ្ងៃចន្ទ ទី១៣ កក្កដា។ Fontainebleau ជាព្រៃធម្មជាតិទំហំជាង ២ម៉ឺនហិចតាដែលមានដើមឈើធំៗ ចំណាស់ៗ និងត្រូវបានគេចាត់ទុកជាគម្របបៃតងរបស់តំបន់ជុំវិញរដ្ឋធានី។
រដ្ឋមន្ត្រីក្រសួងមហាផ្ទៃដែលចុះទៅតាមដានស្ថានការណ៍ដល់ជិតកន្លែងរងគ្រោះបានគូសបញ្ជាក់ថា ភ្លើងឆេះព្រៃ Fontainebleau អាចជាទង្វើដោយចេតនា។ ចំណុចចាប់ផ្តើមឆេះមានដល់ជាង ១០កន្លែងក្នុងក្រឡាផ្ទៃរង្វង់ ១ពាន់ម៉ែត្រអាចជាសញ្ញាសង្ស័យដែលនាំឲ្យគេគិតថាជាអំពើចេតនាចង់ឱ្យមានភ្លើងឆេះ។ នេះបើតាមប្រសាសន៍របស់លោករដ្ឋមន្ត្រីដដែល។
អាកាសធាតុក្តៅខ្លាំងហួតហែងខុសប្រក្រតីតាំងពីជាច្រើនថ្ងៃក្នុងតំបន់រដ្ឋធានី និងតំបន់ជាច្រើនរបស់ប្រទេសបានបង្កើនគ្រោះភ្លើងឆេះព្រៃខ្លាំងណាស់។ ស្ទើរពេញផ្ទៃប្រទេស ក្រុមសង្គ្រោះកំពុងប្រញឹកប្រយុទ្ធប្រឆាំងនឹងភ្លើងព្រៃ ជាពិសេសនៅតំបន់ភាគខាងត្បូង។នៅថ្ងៃអាទិត្យ ទី១២ កក្កដា មានករណីភ្លើងឆេះព្រៃចំនួន ៣កន្លែងបានចាប់កើតឡើងស្ទើរទន្ទឹមពេលគ្នានៅភាគខាងលិចនៃប្រទេស។ តាំងពីចូលឆ្នាំ២០២៦មក ភ្លើងបានដុតព្រៃប្រមាណ ៣២ ០០០ហិចតា ពោលគឺច្រើនជាងពីរដង បើគិតក្នុងរយៈពេលដូចគ្នានៅឆ្នាំ២០២៥៕
