មនុស្សយ៉ាងហោចណាស់ ២៧នាក់បានស្លាប់ និងជាច្រើននាក់ផ្សេងទៀតរងរបួសក្នុងឧបទ្ទេវហេតុអគ្គិភ័យ ឆាបឆេះក្លឹបកម្សាន្តមួយកន្លែងនៅទីក្រុងបាងកក។ នេះបើតាមរបាយការណ៍បឋមរបស់អាជ្ញាធរថៃ។ អភិបាលក្រុងបាងកក លោក ឆាដឆាត សិទ្ធីផុន (Chadchart Sittipunt) ឱ្យដឹងថា អគ្គិភ័យបានឆេះយ៉ាងសន្ធោសន្ធៅ និងបានរាលដាលយ៉ាងខ្លាំងទៅលេបត្របាក់ក្លឹបកម្សាន្តនោះត្រឹមតែប្រមាណ ៣០នាទីប៉ុណ្ណោះ។ យ៉ាងណាក៏ដោយ អាជ្ញាធរថៃបានបើកការស៊ើបអង្កេតលើករណីនេះ។
បា ឬក្លឹបកម្សាន្តរាត្រី «Rong Beer Na Lat Phrao» ដែលជាកន្លែងកម្សាន្តដ៏ពេញនិយមមួយ ក្នុងសង្កាត់ឡាតប្រៅ បានឆាបឆេះកាលពីរំលងអធ្រាត្រ យប់ថ្ងៃទី១២កក្កដានេះ បណ្តាលឱ្យមនុស្ស ២៧នាក់ស្លាប់ និងរបួស ៦៣នាក់។ ក្នុងចំណោមអ្នករងរបួសទាំង ៦៣នាក់ គឺ ២២នាក់ស្ថិតនៅក្នុងសភាពធ្ងន់ធ្ងរ។ អភិបាលក្រុងបាងកក លោក ឆាដឆាត សិទ្ធីផុន បានឱ្យដឹងថា ភ្លើងបាន ឆេះរាលដាលយ៉ាងឆាប់រហ័សឡើងដល់ពិដាន និងថា ផ្សែងចេញពីអគ្គិភ័យដ៏សន្ធោសន្ធៅជាហេតុផលនាំឱ្យមានមនុស្សស្លាប់ច្រើននាក់ដូចនេះ។
តាមតុល្យការបឋមរបស់អាជ្ញាធរថៃ គិតត្រឹមព្រឹកថ្ងៃទី១៣កក្កដានេះ ឧបទ្ទេវហេតុឆាបឆេះក្លឹបកម្សាន្តនេះមានអ្នកស្លាប់ភាគច្រើនត្រូវបានរកឃើញនៅក្នុងបន្ទប់ទឹកដែលហ្វូងមនុស្សនាំគ្នាសម្រុករត់ចាកចេញ ក្នុងស្ថានភាពភ័យស្លន់ស្លោរខ្លាំង។ មូលហេតុបឋមនៃអគ្គិភ័យនេះត្រូវបានសមត្ថកិច្ចថៃសន្និដ្ឋានថា អាចបណ្តាលមកពីឆ្លងចរន្តខ្សែភ្លើងនៅម្តុំឆាកតន្រ្តី និងរាលដាលពេញមួយហាង ដោយប្រើពេលត្រឹមតែប្រមាណ ៣០នាទីប៉ុណ្ណោះ។
ភ្លាមៗក្រោយកើតហេតុការណ៍អគ្គិភ័យនេះ នាយករដ្ឋមន្ត្រីថៃ លោក អនុធិន ឆានវីរៈគូន បានទៅដល់កន្លែងកើតហេតុ និងបានបញ្ជាក់ថា មូលហេតុផ្លូវការនៃអគ្គិភ័យនេះកំពុងស្ថិតក្រោមការស៊ើបអង្កេតនៅឡើយ។ នៅប្រទេសថៃ វិធីសាស្ត្រអនុវត្តដ៏ធូររលុងរបស់អាជ្ញាធរចំពោះបទប្បញ្ញត្តិសុខភាព និងសុវត្ថិភាព ជាពិសេសនៅក្នុងបា និងក្លឹបរាត្រីបានបង្កើនការព្រួយបារម្ភជាយូរមកហើយ។ ជាក់ស្តែង ក្នុងឆ្នាំ២០២២ មនុស្ស ២៥នាក់បានស្លាប់ ក្នុងឧបទ្ទេវហេតុអគ្គិភ័យឆាបឆេះក្លឹបរាត្រី «Mountain B» នៅខេត្តឈុនបុរី ភាគខាងកើតប្រទេសថៃ។ ក្នុងឆ្នាំ២០០៩ ប្រទេសថៃក៏កើតមានហេតុការណ៍អគ្គិភ័យឆាបឆេះដ៏សាហាវមួយទៀតក្នុងឱកាសបុណ្យចូលឆ្នាំថ្មីនៅក្លឹបកម្សាន្ត «Santika» ក្នុងទីក្រុងបាងកកដោយបានសម្លាប់មនុស្ស ៦៧ នាក់ និងរបួសជាង ២០០នាក់៕
