ក្រុមប្រដាប់អាវុធនៅស៊ូដង់ ពឹងផ្អែកហិរញ្ញវត្ថុដើម្បីបន្តធ្វើសង្គ្រាមរ៉ាំរ៉ៃ តាមរយៈការក្តោបក្តាប់ និងចម្រាញ់ធនធានធម្មជាតិ ក្នុងតំបន់ដែលពួកគេកាន់កាប់។ នេះបើតាម អង្គការសហប្រជាជាតិ ដោយអំពាវនាវឲ្យបណ្តារដ្ឋាភិបាលផ្សេងទៀត ត្រូវយកចិត្តទុកដាក់ទប់ស្កាត់។ ទន្ទឹមនឹងគ្នានេះ សហភាពអឺរ៉ុប ក៏បានសម្រេចដាក់ទណ្ឌកម្មទៅលើអាជីវកម្មមាស ដែលមានប្រភពមកពី ស៊ូដង់។
ភាគីជម្លោះប្រដាប់អាវុធនៅស៊ូដង់ ទាញយកប្រាក់ចំណូលយ៉ាងសន្ធឹកសន្ធាប់ អំពីសម្បត្តិធម្មជាតិលើតំបន់ដែនដីដែលពួកគេត្រួតត្រា តាមរយៈសកម្មភាពចម្រាញ់និងធ្វើអាជីវកម្មរ៉ែ ដើម្បីយកទៅផ្គត់ផ្គង់សេដ្ឋកិច្ចសង្គ្រាម ហើយបន្តធ្វើបាបជិះជាន់ប្រជាជន។ នេះបើតាម លោក វ៉ុលក័រ តួក ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស។ លោកសង្កត់ធ្ងន់ទៀតថា សម្បត្តិធម្មជាតិក្នុងប្រទេសស៊ូដង់ គួរតែត្រូវបែកចែកប្រយោជន៍ដោយសមធម៌ដល់ប្រជាជន។ តែគួរឲ្យសោកស្តាយពន់ពេក ពលរដ្ឋស៊ូដង់គ្មានទទួលចំណែកអ្វីសោះ ក្រៅពីទម្ងន់ទុក្ខព្រួយ។ ឧត្តមស្នងការសិទ្ធិមនុស្ស ក៏អំពាវនាវឲ្យរដ្ឋាភិបាលនីមួយៗ ត្រូវយកចិត្តដាក់ទប់ស្កាត់លំហូរអាជីវកម្មរ៉ែរបស់ស៊ូដង់។
សង្គ្រាមស៊ូដង់ ស្មុគស្មាញខ្លាំង។ ក្រៅពីជម្លោះរើសអើងជាតិពន្ធុ មេបញ្ជការកងទ័ពកំពូលៗ ២នាក់ ប្រជែងអំណាចគ្នា គឺឧត្តមសេនីយ Abdel Fattah al-Burhan ជាមេបញ្ជការកងទ័ពនៃរដ្ឋាភិបាលស៊ូដង់ និងឧត្តមសេនីយ Mohamed Daglo ជាប្រមុខដឹកនាំទាហានប៉ារ៉ាស៊ូដង់ ដែលត្រួតត្រាដែនដីមួយផ្នែកធំ នៅតំបន់ដារហ្វួរ។ កម្លាំងកងទ័ពទាំង២ក្រុម ផ្ទុះអាវុធខ្លាំង នៅខែមេសា ឆ្នាំ២០២៣។
សង្គ្រាមស៊ីវិល ៣ឆ្នាំចុងក្រោយនេះ សម្លាប់មនុស្ស យ៉ាងតិច ២ សែននាក់។ អង្គការសហប្រជាជាតិ បានប្រកាសអាសន្នអំពីវិបត្តិមនុស្សធម៌ នៅស៊ូដង់។ ដ្បិតថា ពលរដ្ឋ ១៥ លាននាក់ត្រូវបង្ខំចិត្តផ្លាស់ទីលំនៅ (៤លាននាក់ ចេញក្រៅប្រទេស ហើយ ១១ លាននាក់ ផ្លាស់ទីក្នុងស្រុក)។ ប្រជាជន ជាង ៣៤ លាននាក់ ខ្វះខាតស្បៀង ហើយក្នុងចំណោមនោះ ពាក់កណ្តាល ជាកូនក្មេង។
កាលពីដើមសប្តាហ៍នេះ សហភាពអឺរ៉ុប បានសម្រេចហាមឃាត់ មិនឲ្យក្រុមហ៊ុនអឺរ៉ុបចម្រាញ់ និងធ្វើអាជីវកម្មរ៉ែមាស ដែលមានប្រភពមកពីប្រទេសស៊ូដង់។ ដ្បិតថា «មាស ជាប្រភពប្រាក់ចំណូលសំខាន់ ដែលបំប៉ន់ភ្នក់ភ្លើងសង្គ្រាមស៊ូដង់ »។ សហភាពអឺរ៉ុប ក៏បានហាមឃាត់សារធាតុផ្សេងៗដែលបម្រើឲ្យដំណើរការចម្រាញ់រ៉ែមាស ដូចជា បារត ជាដើម មិនឲ្យនាំចូលទៅស្រុកស៊ូដង់ នោះឡើយ។
ស៊ូដង់ ផលិតមាសសម្រាប់នាំចេញ ច្រើនជាងគេ ក្នុងតំបន់អាហ្វ្រិក។ គ្រាន់តែក្នុងឆ្នាំ២០២៤ ស៊ូដង់ នាំចេញមាស ជាង ៧០ តោនឯណោះ។ ពោលគឺ នាំចេញស្របច្បាប់ ចំនួនយ៉ាងតិច ៣១តោន ហើយនាំចេញខុសច្បាប់ យ៉ាងហោច ៤០ តោន។ មាសរាប់សិបតោនទាំងនោះ ឆ្លងកាត់ប្រទេសអេហ្ស៊ីប ឆាត និងលីប៊ី មុននឹងឆ្ពោះទៅកាន់ទីក្រុងឌូបៃ ប្រទេសអេមីរ៉ាត់អារ៉ាប់រួម ដែលជាទីផ្សារអាជីវកម្មមាសដ៏ធំក្នុងពិភពលោក។
ទោះម្តេចក្តី ទណ្ឌកម្មសហភាពអឺរ៉ុប មានទម្ងន់ត្រឹមជានិមិត្តរូប ដ្បិតថា សហភាពអឺរ៉ុប តំណាងឲ្យត្រឹមតែ១០%ប៉ុណ្ណោះនៃចរាចរណ៍មាស លើពិភពលោក។ ចំណែក មាសស៊ូដង់ ចំនួនដល់ទៅ៩០% នាំចេញទៅទីក្រុងឌូបៃ។ ម្ល៉ោះហើយ អ្នកជំនាញ Cameron Hudson ជូនយោបល់ថា ប្រសិនបើចង់ដាក់ទណ្ឌកម្មឲ្យមានប្រសិទ្ធភាព សហភាបអឺរ៉ុប គួរតែចេញវិធានការ ឬដាក់សម្ពាធ ទៅលើ អេមីរ៉ាត់អារ៉ាប់រួម៕
